တရုတ်ကိုဗစ်ဆေး အစွမ်းပြဖို့ ခြောက်လကနေ ရှစ်လအထိ စောင့်ရမယ်လို့ ပညာရှင်တွေ အသိပေး

တရုတ်သိပ္ပံပညာရှင်တွေဟာ တရုတ်နိုင်ငံကထုတ်လုပ်တဲ့ ကိုဗစ်ကာကွယ်ဆေးတွေက ဆေးထိုးပြီးတာနဲ့ အစွမ်းပြမှာမဟုတ်ဘဲ ဆေးအာနိသင် အပြည့်အ၀ ပျံ့နှံ့ဖို့အတွက် ခြောက်လကနေ ရှစ်လအထိ အချိန်ယူရမှာဖြစ်တယ်လို့ အသိပေးလိုက်ပါတယ်။ တရုတ်ကာကွယ်ဆေးတွေနဲ့ပတ်သက်လို့ ဆေးစမ်းသပ်ချက်ဆိုင်ရာ စာရင်းညွှန်းကိန်းတွေ အတိအကျ ထွက်မလာသေးပေမယ့် တစ်ချို့နိုင်ငံတွေကတော့ ဝယ်ယူအသုံးပြုတာတွေ ရှိနေပြီပဲဖြစ်ပါတယ်။ တရုတ်နိုင်ငံကထုတ်တဲ့ ကာကွယ်ဆေးမှမဟုတ်ဘဲ ဘယ်ကာကွယ်ဆေးပဲဖြစ်ဖြစ် ကိုယ်ခံအားစနစ်ထဲ အပြည့်အ၀ လည်ပတ်အလုပ်လုပ်ဖို့အတွက် အချိန်ကာလတစ်ခုကြာ အနည်းဆုံး စောင့်ရမှာပဲဖြစ်တယ်လို့ တရုတ်ပညာရှင်တွေက ပြောကြားထားပါတယ်။