Twitter: Bilal_Ghareeb
*
00:00​ مقدمة
03:55 القصة​
11:20 الجيمبلاي
30:02 البريزنتيشن
31:05 الخلاصة
*
Game: Dragon's Dogma: Dark Arisen
Developer: Capcom, QLOC
Publisher: Capcom, Capcom U.S.A., Inc.
Platforms: Nintendo Switch, PlayStation 4, PlayStation 3, Xbox 360, Xbox One, Microsoft Windows
دراجونز دوجما وفي رأي كتير من الناس تعتبر واحدة من اهم العاب الار بي جي واكثرهم تميزا في التصنيف وشخصيا كل ما كان يطلع قدامي حد بيتكلم عن اللعبة سواء في ريتروسبيكتف او دوكيمينتري او حتى بوستات عشوائية كان بيبقا الكلام في الغالب يا اما ايجابي بشكل كبير يا اما عن قد ايه اللعبة دي محتاجة جزء تاني في اقرب وقت وده خلق عندي فضول وتساؤلات كتير عن اللعبة وعن ايه اللي مخليها في نظر ناس كتير واحدة من اهم العاب التصنيف ده وفي الحقيقة مش كلام الناس بس فاللعبة ان جينا للحق نجحت عالمستويين التجاري والنقدي بكسرها لحاجز المليون نسخة مباعة عالميا وده كان الهدف بتاع كابكوم ساعتها من المشروع والرقم ده زاد مع الوقت طبعا فعلى حسب اخر احصائية قريتها اللعبة بايعة لحد السنة اللي فاتت حوالي 8 مليون نسخة ده غير تحقيقها لمتوسط تقييمات معقول جدا بنائا على مراجعات النقاد
وبسبب فضولي تجاه اللعبة وخلال عملية بحثي البسيطة عنها اتكعبلت في الجي دي سي توك بتاعت هيدياكي اتسونو مخرج اللعبة واللي اتعملت في 2013 واللي اتكلم فيها عن بدايات الفكرة وتفاصيل تقنية تخص عملية التطوير وازاي ان فكرة انه يعمل لعبة ار بي جي تكون سنجل بلاير ولكن حجر الاساس بتاعها هو عنصر اونلاين مميز زي البونز بدأت تتكون ف دماغه من سنة 2000 تقريبا ولكن بسبب انشغاله بمشاريع تانية في الاستوديو اضطر انه يركن الفكرة على جنب لغاية 2008 تحديدا لما كابكوم طلبوا منه اي بي جديد واشترطوا ان الاي بي ده يبيع مليون نسخة
في اللحظة دي قرر اتسونو انه يرجع لفكرته القديمة وبالفعل عمل ديزاين دوكيمينت بسيطة بعنوان ذا بي بي اس ار بي جي او السي ام سي اونلاين عشان يحاول يقنع الادارة بالفكرة
وعملية اقناع مجلس الادارة ساعتها في 2008 بفكرة لعبة زي دراجونز دوجما كانت تحدي كبير لانه توقع ادائها تجاريا ساعتها مكنش حاجة سهلة وده بيرجع لأنه مكنش في زيها كتير في السوق وتحديدا السوق الياباني والمشكلة مكنتش من عدسة البزنس بس بل ان الفكرة نفسها مكنتش مفهومة لكتير من الناس واتسونو شخصيا اتكلم عن النقطة دي وازاي انه فعلا في ناس مكنتش قادرة تفهم الفكرة لغاية اما اللعبة نزلت بشكل تجاري وبقت قابلة للعب وده مفهوم جدا بصراحة لان لو رجعنا بالزمن ل2008 فهنلاقي ان تصنيف الاكشن ار بي جي مكنش لسا انتشر واخد الشعبية الكبيرة اللي هو واخدها النهاردة احنا بنتكلم عن فترة كان لسا مفيش حاجة اسمها دارك سولز كانت لسا اوبليفين يادوبك مكملة سنتين مش اكتر مكنش لسا في دراجون ايج فول اوت 3 كانت لسا نازلة في نفس السنة فالموضوع كان لسا جديد نوعا ما وخلي بالكو ان اغلب الامثلة دي امثلة غربية مش يابانية لو جينا نبص للسوق الياباني فهنلاقي ان اغلب الار بي جيز اللي كانوا موجودين فيه ساعتها العاب ترن بيز ار بي جيز وكان لسا مفهوم الاكشن ار بي جي ده مش موجود ولكن في اخر الحكاية كابكوم بتوافق على المشروع وبالفعل وبعد مدة تطوير امتدت لحوالي ٤ او ٥ سنين بتنزل دراجونز دوجما في سنة 2012 لأجهزة البلايستيشن 3 والاكس بوكس 360 لأول مرة وبعدها بسنة بيعاد اصدارها بنسخة كاملة فيها الدي ال سي واللي كانت بعنوان دارك اريزين ونفس النسخة الاخيرة دي بيتعملها بورت للبيسي في 2016 وبورت تاني في 2017 لأجهزة الجيل وقتها واللي هما البلايستيشن 4 والاكس بوكس ون واخيرا في 2019 بورت للنينتيندو سويتش
وبما ان كابكوم وفي شهر مايو من السنة اللي فاتت وتحديدا في حدث بلايستيشن شو كيس اعلنوا عن الجزء التاني من اللعبة بعرض اقل حاجة تتقال عنه انه مبهر وبيوضح القفزة التقنية اللي حصلت في ال12 سنة اللي عدت بين الجزئين وبعدها بتتوالى العروض والاعلانات وبنوصل اخيرا لمعاد اصدار الجزء التاني واللي هيبقا في 22 من شهر مارس الحالي من سنة 2024 ساعتها قلت لنفسي مفيش انسب من الفترة دي عشان ارجع واخوض تجربة الجزء الاول لأول مرة في حياتي بشكل كامل وده اولا من باب الاستعداد للجزء التاني وثانيا من باب اني ارضي فضولي تجاه اللعبة بعد ما كنت حاولت العبها قبل كدا من سنتين ووقفت بعد 6 ساعات مش اكتر وطبعا عشان اقدر اقدم المراجعة البسيطة دي واللي من خلالها هحاول اوضح تجربة الجزء الاول عاملة ازاي في 2024 بعد 12 سنة من اصداره بشكل رسمي فبعد رحلة استمرت لحوالي 40 ساعة هي مدة تختيمتي الاولى خلونا نشوف دراجونز دوجما قدمت ايه