កម្មវិធីដំណើរខ្ញុំ៖ ទឹកធ្លាក់ច្រកល្អៀង កាន់តែពង្រីកសក្ដានុពលទេសចរណ៍ ផ្ដល់ការសប្បាយលើសក្ដីប្រាថ្នា
Vložit
- čas přidán 31. 10. 2021
- កម្មវិធីដំណើរខ្ញុំ៖ ទឹកធ្លាក់ច្រកល្អៀង កាន់តែពង្រីកសក្ដានុពលទេសចរណ៍ ផ្ដល់ការសប្បាយលើសក្ដីប្រាថ្នា (Video inside)
(ពោធិ៍សាត់)៖ រមណីយដ្ឋានទឹកធ្លាក់ច្រកល្អៀង មិនត្រឹមតែជាទីទេសចរណ៍មួយថ្ងៃឬមួយពេល ដូចដែលលោកអ្នកធ្លាប់ដឹងនោះឡើយ តែក៏នៅមានទីលម្ហែបែបធម្មជាតិជាច្រើនទៀត ដែលទេសចរភាគច្រើនមិនទាន់បានទៅដល់ ពិសេសប្រសិនបើឡើងទៅកាន់ល្បាក់ទឹកធ្លាក់នៅខាងលើទៀតនោះ មិត្តទេសចរដែលនិយមដើរព្រៃច្បាស់ជាប្លែកអារម្មណ៍ជាក់ជាពុំខាន ដែលនៅទីនោះគឺអំណោយផលខ្លាំងចំពោះសកម្មភាពទេសចរណ៍បោះតង់ (Camping)។ រមណីយដ្ឋានទឹកធ្លាក់ធម្មជាតិនេះមានទីតាំងស្ថិតក្នុងភូមិបំណក់ ឃុំឈើតុំ ស្រុកក្រគរ ខេត្តពោធិ៍សាត់។
ដើរពីក្រោយមគ្គុទ្ទេសក៍សហគមន៍ សសៀរតាមជម្រាលគិរីព្រឹក្សា ទេសចរយើងនឹងបានទៅដល់ដំណាក់ម្លប់ជ្រៃក្រឹម ដែលមានដើមជ្រៃមួយដើម ប្រក់គ្របពីលើជ្រលងទឹកហូរដ៏វែងអន្លាយ។ បន្តដំណើរទៅមុខទៀត អ្នកទេសចរក៏បានទៅដល់ដំណាក់ទឹកធ្លាក់ ដែលពោរពេញទៅដោយទស្សនីយភាពដ៏ស្រស់ត្រកាល។ សោមនស្សទិវា កើតមានតាំងពីដើមផ្លូវនៅផ្នែកខាងក្រោម រហូតដល់គោលដៅដំណាក់ទឹកធ្លាក់នៅផ្នែកខាងលើ។
សក្ដានុពលទេសចរណ៍នៅដំណាក់ទឹកធ្លាក់នេះ ពោរពេញទៅដោយទេសភាពពិសេសមួយបែបពីគេ មិនធ្វើឱ្យទេសចរពីនាយខកបំណងឡើយ។ ទឹកធ្លាក់ថ្លាខ្យងពណ៌បែបធម្មជាតិ កាន់តែអន្ទងចិត្តមិត្តអ្នកទេសចរយើង ឱ្យលោមលេងកម្សាន្តឥតខ្វល់ហ្មងសៅ។
បរិយាកាសនៅក្នុងជំរំធម្មជាតិនេះដែរ គឺមានភាពស្ងប់សុខឥតក្ដីរំខាន ស័ក្តិសមបំផុតសម្រាប់អ្នកទេសចរដើរព្រៃ ដែលចូលចិត្តស្រលាញ់ធម្មជាតិ និងភាពស្ងប់ស្ងាត់។
ក្រៅពីសោភ័ណកល្យាណនៅលើបុព្វតាប្រឹថពី ច្រកល្អៀងយើងក៏មានទស្សនីយភាពក្រោមទឹកថែមទៀតដែរ។ ហ្វូងមច្ឆាហែលហមអាស្រ័យគង្គាវារី បង្កើតបាននូវភាពទាក់ទាញប្លែកច្រើនប្រការ។
សូរិយាទន់ទាបចាកនាយអាកាស លំនៅចល័តក៏បានដំឡើងរួចជាស្រេច នៅក្បែរភ្នក់ភ្លើងនិងមាត់ទឹក អមដោយបរិយាកាសរមណីយភិរម្យ។ ភ្លក្សរសជាតិបោះតង់នៅដំណាក់ទឹកធ្លាក់មួយយប់ ពិសិដ្ឋសិរីនឹងកើតមានដល់អ្នកទេសចរគ្រប់គ្នា ដែលបានមកទស្សនាកម្សាន្តនៅទឹកធ្លាក់ច្រកល្អៀងនេះ៕
* កម្មវិធីដំណើរខ្ញុំ នាំលោកអ្នកទៅកាន់តំបន់ទេសចរណ៍កម្សាន្តដ៏សម្បូរបែប និងជាទីគយគន់!
សូមទស្សនាវីដេអូទេសចរណ៍នៅទឹកធ្លាក់ច្រកល្អៀង ដែលផលិតដោយ Fresh Studio ក្នុងកម្មវិធី «ដំណើរខ្ញុំ» វគ្គ៥៖
* Please JOIN Channel Telegram ផ្លូវការរបស់បណ្តាញព័ត៌មាន Fresh News. ដើម្បីទទួលបានព័ត៌មានថ្មីៗប្រចាំថ្ងៃ ២៤ម៉ោង !
Join US: t.me/freshnewsasia
😘❤️️❤️️❤️️😘
🥰🥰