Дархан аварга Шаравын Батсуурь
Vložit
- čas přidán 29. 08. 2024
- Батсуурь аваргад өргөх шүлэг
Нэрт яруу найрагч Тоомойн Очирхүү
1994.03.27
Цастай Алтайгаа мөрлөнхөн төрсөн
Цайдам говио зарланхан төрсөн
Халх монголын дархан аварга
Хасаг Жаргалангийн унаган аварга
Морьтон ардын баярын магнай
Монгол бөхийн тэргүүн магнай
Нэр зүсээрээ ч Батсуурь
Нэмэх цолоороо ч Батсуурь
Нээрэн хүчит Батсуурь аваргаа!
Улсын наадмын дэвжээнд дэвэн байгааг тань харахад
Уулын хүрэн бүргэд нисэж байх шиг санагддагсан
Асар майхан шиг цээж тань ханхайж байгааг харахад
Алтайн хүрэн байц сүүхийж байх шиг бодогддогсон
Хархан сайхан хөмсөг дороос тань
Харц гярхай хоёр нүд гялалздагсан
Ханцуй торгон зодог дороос тань
Харьшгүй хүчтэй хоёр гар дэвдэгсэн
Хоёрхон хуруу нь хонгонд хүрэхэд
Учраа бөх нь хумигдаад ирдэгсэн
Хойморын зайнаас харваад орохдоо
Хоромхон зуур өргөөд тавьдагсан
Суугаад босов уу гэтэл суйлж байгаа нь тэр
Сул гишигдэлгүй гүйж байгаа нь тэр
Дархан аврага Батсуурь
Давлаа! гэж Радио хоолой зарладагсан
Гар дунгуй хийхэд нь
Газрын хөрс эргэх шиг болдогсон
Цэрвүү барьцнаас дугтарахад нь
Цэнхэр асар дайвах шиг болдогсон
Цээжний бяраа гаргаж байгаа нь тэр
Цэнгэлтэй наадамчдаа баярлуулж байгаа нь тэр
Аварга Батсуурь туг тойрч байна! гэж
Радио хоолой дахиад л зарладагсан.
Дөчин долоон оны нарлагхан зун
Дөнгөж хорин тавтай хилчин эр
Наадам эхлэхэд алдар цолгүй бөх байсан
Наадам өндөрлөхөд Арслан болж түрүүлсэнсэн
Өвдөг шороодоогүй Улсын Дархан аврага минь
Өндөр Алтайн уулсын босоо аварга минь
Эрхт төрийнхөө наадамд түүнээс хойш
Алтай Ханаа дахин дахин нэрлүүлсэн
Эрийн сайхан хиймориор
Аав Шараваа дандаа та баярлуулсан
Түрүү бөхийн боорцогноос хишиг хүртэж
Түмний наадмын тоосонд хийморио сэргээж явсан
Нарлаг Алтайн чинь хүү өнөөдөр эрийн цээнд хүрч
Найраг шүлгийн тэнгэрт эзэнтэй дуулал өргөж байна, сонсоорой
Омголон бүргэдийн аагаар
Одонд та хальсан ч
Олон ардынхаа сэтгэлд
Одоо ч та босоо яваа!
Туулын хөндий, Яармагийн талбай
Туг тойрсон наадмын жавхаа...
Алдар гавьяа тань ч Батсуурь
Аз хийморь тань ч Батсуурь
Аяа хүчит Батсуурь аваргаа!
Дурсаж таныгаа цоллоход
Дууны дэвжээ дэвэлзэж байна
Дээдэлж таныгаа бахдахад
Дэлхийн дэвжээ хотолзож байна.
Говь Алтай Аймгийн минь бахархал!