A mi ko fal hmun fienriel ah|| Lalhluopui Infimate, Lalneimawi Puruolte & Upa Lalmalsawm Infimate

"A mi ko fal hmun fienriel ah"
Release tu : Rev. Dr. V. Lalnghakthang
A saktuhai
1. Lalhluopui Infimate
2.Lalneimawi Puruolte
3. Upa Lalmalsawm Infimate
Hi hla hung suok dân tlângpui:
June 2021 khan Covid leiin kan insûnga harsatna nasa tak kan tuok a, nau le te a ieng a âng la hre nawhai leh inṭhe dar a ṭul ta a. Zân khat khawm mi dang ina la riek hran ngai lo, ka nautehai pahni chu ṭap pumin mi ngai êm êm in kan in kâwlhai inah kan mâksan a. Kei, ka ruolnu le kan naute chintak nene ne lai leh kan pathum chun Covid Care, CCPur ah admit in kan um a. Mi danghai anga zuk dam ve el dinga inngaina kan nei lai chun kan inring hman hma chun kan lo serious hman ve khawp el a. Doctor enkawlna hnuoia treatment nasa takin kan thaw a, kan chau hman hle. Ka ruolnu lem chu ka nêkin a hung thaw hla a, oxygen khawm ni 10 sûng, sûn le zân châwl lovin kan pêk a. Treatment thaw ding âwm po an thaw zo hnung khawm chun 02 level an sâng thei ta naw a, ka bei a dawng rûk ta êm êm a. Oxygen kan inpêk a ni 9 zân lem chu a taksa pumpui hi inhning dut khawpin minute 15 vêl a hin a hung inkei ta a, ka insûng, ka nau le tehai ngirhmun ka ngaituo a, ka mihriem ram chu a chim hne ve hle. Ruolṭha le hmangaitua ka ngai haiin an mi ṭin san zo man ta aw! ti ramah beidawng taka zân khuo vawi iemani zat ka var hnungin, Pathien kuomah bawk ka tlu lut nâwk a, " Ka ṭawngṭaina nghil am an ta? Ka ṭawngṭaina bêk hriet nisien, mi dang chu ko naw ning Lalpa” tiin ama chu ka ko mawl mawl a. Zânre a hung tlung a, imu rêng a suok thei nawh. Chuong lai chun keimaah thu a hung tlung ta a. “Hung rawh, hmun fienriel ah inbieng ei tih” ti râwl ka hriet ta tlat el a. Ka nuhmei le naute chu Pathien kuta kan hlân a, khum zâwl a chun ka mâksan a, hmun fienriel ka zawng a, Pathien ka ko ta a. Hmun fienriel a chun Lalpa mi biekna râwl chu ka hriet a, ama thlamuonga mak tak el chu ka chungah a hung tlung ta a.
Chu taka Pathien thu hung inlang chu “Ngai ta, i kuomah ka um a, i fena taphawtah vêng pei ka ti cheh a, hi rama hin ṭhuoi kîr nâwk ka ti che: i kuoma ka hril hi ka thaw hmakhat chun thlathlam naw ning che," ti thu hi a nih.
Jacob, Haran tienga a tlânhmang khan lam laka zân thimin a nang chil a, hmun ram re le fienriel tak a chun beidawngin lung a lak a, zân lukham dingin chu lung chu a hmang ta a. Jacob ṭhangpuitu ding nei lo, beidawng taka hmun fienriela lunglukhama zân hun hmangtu kuom a chun Pathien a lâr a. Jacob kuom a chun vân leilâk a thlâk pêk a, a suk le tungin a vântirkohai chu an inlawn a, leilâk tâwp tak a chun Pathien chu a ngîr a, Jacob kuom a chun, "Kei hi LALPA i pu Abraham Pathien le Isak Pathien chu ka nih, i zâlna hnuoi kha i kuoma le i thlahai kuomah la pêng ka ti cheu; i thlahai chu hnuoia pilvut zâtin la um an ta, thlang tieng dâm, sak tieng dâm, hmâr tieng dâm, sim tieng dâm indar lien i ta, nangma le i thlahaia chun khawvêla hnam tin la thawveng an tih. Ngai ta, i kuomah ka um a, i fena taphawtah vêng pei ka ti cheh a, hi rama hin thuoi kîr nâwk ka ti che: i kuoma ka hril hi ka thaw hmakhat chun thlathlam naw ning che," tiin a kuomah Lalpa an lâr a. (Gen. 28:12-15)
Pathien in Jacob kha sukpung a tum a, malsâwm a nuom a, a râwl fie taka inhriettir a nuom leiin Hmunre/hmun fielriel ah a lo nghâk a nih. Zân hmun fienriel a chun Pathien chun Jacob chu be in malsâwmna an khum ta a nih.
Pathien in mi sukpung a nuom a, malsâwmna thurûk mi hril a tum pha chun a nauhai hi hmun inhawi annawleh a huou huouna hmunah ni lovin hmun fienriel ah a mi ko fâl hlak. Chu hmun chu hmun inhawi lo ni naw sienkhawm, a hmangaina einiah sukpunga a umna hmun, hratna thar ei dawngna hmun, a râwl fie nâwk zuola ei hrietna hmun a lo ni hlak. Mihriem tienga harsatna zânthim ei tihai khawm hi a hmangaina inlangtirtu an lo ni hlak. Ei inzinna leilung a hin ei lukham a chang châng um a ta, an nem châng khawm um a tih. Pasietna le retheina dâm, taksa bawrsâwmna dâm lukham anga ei hmang châng a bo nawh. Hmusit le hnengdena dâm, demsietna tinrêng dawnga thlasie taka chuong thilhai chu ruolṭha anga ei intlawn pui châng khawm a bo chuong nawh. Chuong po po ei tuor phaltu chun a hun taka a mi ṭhuoi suok nâwk hlak. "Iengkim ka tuokhai hi Ama hriet pui ka nih" tia Amaah châwlna ṭha neituhai hi mi vângnei an nih.
Chu zân chun a thu chau ni lo, hla khawm Lalpa’n a mi pêk sa a. Chu hla chu thei ang angin kan buoipui a. Kan thiltum tak chu hi hla hmang hin Lalpa’n mi beidawng le lungngaihai kuomah hratna thar pe sien, Pathien hi innghatna tlâk, zui tlâk a ni zie hi inlangsâr zuol sien ti hi a nih. An pâkna hla ngaituhai po po Lalpa'n malsâwm raw sen.
Rev. Lalngailien Puruolte