Marsa Alam

مرسي علم... مالديف مصر..
زي ما ناس كتير بتقول اسكندريه عروس البحر المتوسط فمرسي علم هي عروس البحر الاحمر بلا منازع، فعلا اللي مراحش مرسي علم مشفش جمال البحر الاحمر. المكان لسه بكر ومحتفظ بجماله وطبيعته الساحره. اقدر اقول انه من احسن الاماكن اللي شفتها في حياتي بس للاسف مش واخد حقه عشان كده حبيت اشارككم التجربه.
ناس كتير مش عارفه مرسي علم فين؟
اللي هيتحرك من القاهره هياخد طريق السخنه وهيعدي علي الجونه والغردقه وسوما ومكادي باي وسفاجا والقصير لحد ما يوصل لمرسي علم يعني كفايه متعه الطريق. المسافه في حدود ٨٠٠ كم. الافضل تسافر بالعربيه عشان في اماكن كتير لازم تزورها هناك و المسافات بينها بعيده. هتحتاج اجازه طويله وعربيه محترمه وبرده مش هتلحق تزور كل الاماكن بس من اهم الاماكن اللي لازم تشوفها:
ابو دباب.. من افضل الاماكن اللي ممكن تعمل فيها سنوركلينج ودايفنج لانك بنسبه ٩٩٪ هتشوف سلاحف او ترسا زي الناس ما بتسميها ده غير جمال الشعب المرجانيه. تذكره دخول المكان ١٥٠ جنيه بس بجد يستاهل اكتر من كده.
2. محميه وادي الجمال... وهناك لازم تزور منطقه القلعان وتتصور مع شجره المانجروف مش هتصدق اللي هتشوفه من طبيعه ساحره وهتعوز تتصور في كل حته.. المكان مش بفلوس بس هتراضي البدو اللي موجدين هناك وهما ناس في قمه الاحترام وعوزينك تمشي وانت مبسوط.
3. شاطي شرم اللولي.. كفايه اسمه.! موجود في محميه وادي الجمال... هتحس انك في حته من الجنه. الشاطئ مصنف من افضل الشواطئ علي مستوي العالم والناس بتزوره من كل مكان احسن ميه ورمل ممكن تشوفهم في حياتك. فعلا مالديف مصر. بتركن العربيه بره وتخش تستمتع بالمكان، من افضل الاماكن اللي ممكن تعمل فيها سنوركلينج او كامبينج.
4. النيزك... وده بقي عباره عن حمام سباحه كبير في وسط البحر. مش هتصدق جمال المنظر. وتفضل كل شويه تطلع من الميه عشان تنط تاني..
5.سطايح...او بيت الدولفين.. للاسف انا معرفتش اروح عشان الجو كان وحش بس علي كلام الناس انت هتبقي بتعمل سنوركلينج وسط عدد كبير جدا من الدولفينز. تخيل انت بقي.
6.مرسي مبارك... برده للاسف مكنش في وقت اروح بس بنسبه كبيره ممكن تشوف عروس البحر او الدوجنج وتتصور معاه.
7. مرسي شجره.. وده مكان مخصص للدايفنج، الناس هناك محترفين جدا والمكان اكتر من رائع هتقدر تعمل فيه غطسات كتير ومش هتزهق والميزه انه بيقدملك كذا باكدج تختار منها.
التفاصيل كلها علي redsea-divingsafari. com
8.بورت غالب.. المكان جميل جدا وفي اهتمام كبير بيه. ممكن تخرج فيه بليل هتلاقي فيه كافيهات ونايت كلبس ممكن تقضي فيها الليله ده غير اليخوت اللي هتعوز تتصور مع كل واحد فيهم.
بجد احنا عندنا كنوز في بلدنا محدش مقدرها والعالم كله بيحسدنا عليها لازم نهتم بيها ونعملها احلي واجمل دعايه............
#Marsa_Alam #Red_Sea_Pride #Maldives_Egypt