E diela shqiptare - Ka nje mesazh per ty - Pjesa 1! (11 nentor 2018)

www.tvklan.al Talk-show LIVE nga Ardit Gjebrea ne KLANHD & TVKLAN; I pari që erdhi në studion e “Ka një mesazh për ty” në “E Diela Shqiptare” ishte babai i Kristinës, zoti Riza.
“Mos, po ti e bërë këtë mi shpirt i babit… o tu bëftë babi”, me këto fjalë dhe me sytë me lot iu drejtua zoti Riza vajzës së tij Kristinës, kur në ekran u shfaq fytyra e saj. Ai u shpreh shumë i surprizuar dhe tha se nuk ia merrte mendja që ishte pikërisht vajza e tij që e kishte thërritur në studio, mbi të gjitha pasi ajo jeton në Gjermani. Ai tregoi se kishte folur me të bijën një ditë më parë.
Sigurisht, zoti Riza e dëgjoi mesazhin e Kristinës me shumë kënaqësi, ndërsa u njoh edhe me kërkesën e saj.
“Ti e di që je pika ime e dobët, që të dua shumë. Kam ardhur këtu vetëm për ty dhe vetëm për nënën. E di sa rrugë e gjatë është apo jo, ti e di që unë e kam frik avionin dhe erdha me autobus. Në radhë të parë kam ardhur për të të falenderuar. Je kujdesur aq shumë për ne, sa tani do doja që të kujdeseshe më shumë për veten tënde. Doja të të thoja që ke një vullnet të paparë. Do doja shumë që siç le duhanin të lesh edhe atë tjetrën (alkoolin). Kjo për faktin sepse dua që nëna të vijë të jetojë me ju në Tiranë. Do doja që nënës t’i premtonim të dy bashkë që ti nuk do e teprosh me alkoolin”.
Zoti Riza: Po mirë ti e di që unë nuk abuzoj dot me alkoolin, sepse bllokohem.
Kristina: E di, po të mos abuzosh fare… fare, të mos pish asnjë pikë.
Kristina ka ardhur enkas nga Gjermania për t’i dhënë një mesazh babait dhe gjyshes. Ajo kërkon nga babai i saj Rizai që të mos konsumojë fare alkool, që jo vetëm të mbrojë shëndetin, por në këtë mënyrë të bindë edhe nënën e tij që të vijë e të jetojë me pjesën tjetër të familjes në Tiranë.
“Edhe dielli nuk do ishte kaq i bukur sa fytyra e kësaj gjysheje. Nuk mund ta konceptoj që një fytyrë kaq e ëmbël dhe kaq e mirë të ketë lidhje me traktorin…” tha Gjebrea, pasi në ekran u shfaq zonja Mediko, e cila ishte këtë të diel në “Ka një mesazh për ty”.Ajo e pranoi ftesën dhe e mbërritur në studio ajo iu drejtua Gjebreas me fjalët: “Të ndjek shumë, të kam në zemër shumë”.
“Ndërsa unë që në momentin e parë që dhamë mesazhin u dashurova me ty”, iu përgjigj Gjebrea.
Më kanë thënë që keni punuar traktoriste?
“Po 27 vjet…”
Po si ia ke dalë me traktorin? Kaq e ëmbël, kaq e brishtë, çlidhje ke ti me traktorin?
“Më mësoi burri”.
Zonja Mediko e kishte parandjerë që në studion e “Ka një mesazh për ty” e kishte thërritur mbesa e saj Kristina. Kjo e fundit, mes lotëve iu lut gjyshes që të mos jetonte më vetëm në fshat, por t’i bashkohej familjes në Tiranë.
“Unë kam ardhur vetëm për ty, për të të dhënë këtë mesazh. Ti e di që të dua shumë shumë. Dua që ti të më premtosh diçka. E mban mend kur ishte gjyshi gjallë, që ishim një familje e bashkuar, nuk ndaheshim asnjëherë? Tani unë jam larg dhe gjithë kohës e kam mendjen tek ty. Nuk dua që ti të rrish më vetëm në fshat dhe sa herë të kam thënë për të jetuar në Tiranë më ke thënë: ‘Të bëjë vitin gjyshi, të bëjë 3 vjet gjyshi, të bëjë 5 vjet gjyshi dhe do vij në Tiranë…” Gjithmonë e ke shtyrë. E kam pritur me padurim që të vish në Tiranë, të jetosh me familjen tënde. Të lutem do ta kërkoja me gjithë zemër që ti të vije në Tiranë”.
Zonja Mediko në fakt pranoi që t’ia plotësonte kërkesën mbesës së saj, por me një kusht…“Dhe nëna të premton do vijë, por të mbushë 5 vjet gjyshi, të bëjmë 5 vjetorin e gjyshit”.
Ajo insistoi se do të presë deri kur bashkëshorti të bëjë 5 vjet dhe pas kësaj tha se do të vinte në Tiranë. E për t’u siguruar se do ta mbajë fjalën, Gjebrea i tha zonjës Mediko se mëngjesin e parë që do të jetë në Tiranë do ta hanë mëngjesin sëbashku.
Ardit Gjebrea: Por kur mbush 5 vjet bashkëshorti?
Zonja Mediko: Më 17 Prill të vitit që vjen.
Ardit Gjebrea: Më 18 Prill mëngjesin do ta hamë bashkë në Tiranë, dakord?
Zonja Mediko: Dakord
Ardit Gjebrea: Dakord? E mban fjalën? Se po nuk e mbajte do të vij të të marr me traktor pastaj në Korçë.