Vaula-valsen

Det er historisk sus over Vaulen; ein gammel markagard på Nordmarka i Surnadal. Garden var ein periode frå 1896 til 1978 eigd av den engelske lord-familien Musters. Ornitologen, krigsveteranen, eventyraren og siste lakselorden i Surnadal - James Musters (1901-1948), som også var med og etablerte Kompani Linge, var eigar av Vaulen frå 1930 til sin død. No er det Surnadal kommune som eig Vaulen, som vart grundig restaurert i 2004.
Vaula-valsen vart laga i samband med produksjonen av ei filmhistorie om Vaulen i 2009, og dei første strofene er eit gammelt tema etter Råg Øyamoå i Surnadal. Vaula-valsen blir her framført på trekkspel av Eistein Bæverfjord og Jon Faukstad, under Vårsøghelga i Surnadal 2011.