KRISTIANINA TSY AKOFA - FA.NA.FA - (Lyrics)

🎼KRISTIANINA TSY AKOFA🎼
Raha te ho Kristianina tokoa
dia ilaina re ny tena miova fo
Samy tokony tsy hisy poakaty
ny toetra ivelany sy anaty
Lehibe sady tena tombontsoa
ny aim-panahy zava-mahasoa
Ny Kristianina efa matihanina
ivom-piainan'i Jesô ka tsy mba fanina
Raha misy misalovana izy ireo
Jesô alohany eo ôôôôôô
Eo afarany eo ôôôôôô
Miady ho azy ireo
'Ty tantara ity ambarako aminao
zava-doza sady tena tsy fanao
Kristianina fa tena mahagaga
na ny toe-piainanay aza sadasada
Jerena ivelany izy toa olo-masina
nefa manan-toetra ratsy mitsinkasina
Tia mivavaka mamonjy tilikambo
hay jiolahy fanao hazalambo
Ratsy toetra toy ny matotoa
tsy mety miova fo ôôôôôô
tsy miova fo ôôôôôô
Tsy miova fo
Misy manana an'ity toetra 'ty
ny mpanara-dia an'i Kristy
Tia vola sady finy ny harena,
manao fanatitra aza izy mihenahena
Na ny rahalahiny aza no mangataka
dia ilaozany mihodina, mihataka
Tranobe maro rihana no an-tsainy,
ka mahihitra kahidy Ingahy rainy
Eh! Ianao ve izany 'Ndriamatoa?
Jesô mampiova fo
Tongava ao Aminy ao
Hiova mpanao soa
Tongava ao Aminy ao
Hiova mpanao soa
KRISTIANINA TSY AKOFA
MIOVA FO SADY MANKATÒ
TANJONY NY LANITRA
MIARAKA AMIN'ANDRIAMANITRA
Misy miaina amin'ity fomba ity,
tsy mba hainy ny maneho ny fitia
Mpitsikera, mitanisa ny taloha
Manaratsy no andaniany ron-doha
Voatetiny avokoa ny lava-trano
hitantarany valamaty sy angano
Fomba ratsy tsy hampandroso velively
Mpitsongoloka sy mampiady angely
Miziriziry amin'ny hevitra bontolo
toe-tsaina bobongono
Ny ratsy dia fanolo
Jeso no hikolo
Ny ratsy dia fanolo
Jeso no hikolo
Ity karazany manaraka ity
midoka tena fa an'i Kristy
Am-piangonana izy dia madio fo
vao miala dia miseho ny toetra lò
Dia misitrika migoka sy mifoka
kalazalahy amin'ny karazan-doka
Teny ratsy tsy faneho masoandro
no afafiny amin'ny vavany isan'andro
Ireo toetra ratsy miafina soloy
ialao, aleo hafoy
Jesôsy no jereo
hiova ianareo
Jesôsy no jereo
hiova ianareo
Maro no mihambo ho Kristianina
fa misoratra amin'ny bokim-piangonana
Manan-toetra mahavàka, mahafanina
mampidangan'isa eo am-panononana
Asa aloha raha mandalo fitsaràna
na ho an-danitra na an-dava-migodàna
Fa Andriamanitra hanavaka ny vary
ka hodorany ireo tsiparifary
Raha tsy miova dieny izao izy ireo
dia ho azon-kenatra eo
Jesô hikororoka
tsy hitondra akofa
Jesô hikororoka
tsy hitondra akofa
KRISTIANINA TSY AKOFA
MIOVA FO SADY MANKATÒ
TANJONY NY LANITRA
MIARAKA AMIN'ANDRIAMANITRA
Ny mpivady ao anaty tokantrano
tena misy 'ty fa tsy tantara angano;
ny vilany, ny lovia, ny sotrokely
misidisidina avy am-baravarankely
Somaritaka, kibay, rà mandriaka
ny akanjo rovitra, mitriatra
Fony vao nifankatia nefa 'reo
mahafinaritra fa tena niombom-peo
Raha misy anie izany ry izy roa
dia avereno ny fitiavana taloha
ôôôô avereno
ny fitiavana taloha
ôôôô avereno
ny fitiavana taloha
Ny tanora indray hono mifanindry
na tenenina aza dia mihindrihindry
Ny fitafy 'zay lazainy hoe lamaody
na mifinjy aza izy tsy mba kaody
Raha jerena toa manao striptizy
mihizifizina izy f'io no tena izy
Jupe, jupe hatrany am-poto-pe
vaky an-drirana no atao manasa-pe
Dia miady lahatra izy hoe Kristianina
Jesô no alaim-baraka
ôôôôôô aiza alaim-baraka
ôôôôôô aiza alaim-baraka
Efa lasa alavitra ny fandrosoana
efa avolenta koa ny traikefa
Tena mampihozongozona finoana
ka ny fohy saina dia mirefarefa
Ny finday fifandraisana any an-danitra
Babela tsy hampino an'Andriamanitra
Solosaina tena mahavaky volana
maro ny tanora no mametraka olana
Isan'andro Facebook, video
ankilabao Jesô
Tongava ao Aminy ao
homeny fo vaovao
Tongava ao Aminy ao
homeny fo vaovao
KRISTIANINA TSY AKOFA
MIOVA FO SADY MANKATÒ
TANJONY NY LANITRA
MIARAKA AMIN'ANDRIAMANITRA
'Zay nomena andraikitra ao am-piangonana
ka mihatsaravelatsihy feno fialonana
Na manao mpitari-bato vilam-bava
fitara-baky mampizarazara tava
Ianao no taratry ny fiaraha-monina
faka tahaka, endriky ny Zanak'olona
Indraindray anefa mampitampim-bava
fa ny Baiboly havadika ho saron-tava
Sasa-poana ianao milaza fananarana
Aleo faranana eo,
Fiainam-baovao iaino dieny izao
Torio, ankalazao amin'ny toetranao
Ianareo mihaino anay mitory teny
resy lahatra fa hiofo ho anjely
Tapa-kevitra fa tena hiova fo
Deraina Andriamanitra Tsitoha
'Ndao hifaly fa indray andro any
mbola hihaona any an-danitra any
Jesô atao filamatra hatrany
dia indro ho tanteraka izany
Izay mivoady tsy haniasia
Banjino i Kalvary
Ny rà nandriaka teo ho antsika zareo
Isika rehetra ireo novonjeny teo
Raha te ho Kristianina filamatra
ka maniry ny ho faly sy ho sambatra
Ny andro iainanao anie manam-petra
aza ilaozana mitaredretra
Voatanisa ireo saribabay
samy voa ianareo sy izahay
Raha te ho Kristianina matihanina
tsy sondriana manao sangodim-panina
Ho antsika mianakavy anie izany
Andao hiova fo
Ny toetra teo aloha ialana avokoa
Finoana mankatò 'zay no atao vaindoha
KRISTIANINA TSY AKOFA
MIOVA FO SADY MANKATÒ
TANJONY NY LANITRA
MIARAKA AMIN'ANDRIAMANITRA
🙏🏻
©FANAky ny FAmindram-po (FANAFA)
#LyricsbyKalo