HUNTER'S QUARTET - ( 1973 ) Hunlai pek a,A Late uh ( Ngaih nop/ Zaknop mahmah ei )

Tu ma 1973 hun lai pekin "HUNTERS QUARTET" ci-a mi tampi in a theih uh, hih laitakah a la uh dawng 7 hong post ka hih manin nong ngaihsak tek un:
HUNTERS QUARTET-TE TANGTHU TOM
Tedim gam sungah Action tawh Quartet la sa masa pen HUNTERS QUARTET-te hi kha ding uh hi.
1955 kim pawlin Burma Divinity School, Insein panin Lai Siangtho sangnaupangte David Young makai-in hong zin uh a, amau pen "Negro Spiritual" ci uh hi. La a sak uh ciangin Nigro mite vom uh ahih manin amau a sun dingin a mai uh belmang nuhin Action lak uh hi. Siam mahmah uh ahih manin zaknop ki sa mahmah hi.
Negro-te pen America-ah sal-a om ahih manun nakpi takin genthei uh a, inn leh lo nei zo omlo banah bangmah nei loin zawngin Khuadam sa mahmah ta leh puanlum nei zolo, khedap hoih nangawn lei zolo bulh zolo uh ahih manun phalbi khuadam pen pum thuak uh hi. Ahi zongin a nungta Pasian um kha uh ahih manun Pasian' kiang a tun uh teh, nikten puansilh kisam nawn lo ding, kham innpi sungah teng ding, cih tawh ki hehnem uh hi. Tua ahih manin a late uh a tam zaw vantung nopna bek mah na bulphuh uh hi.
Hih tawh kizui-in Rev. On Khan Suan (Phaiza) makaihna tawh 1967 kumin "HUNTERS QUARTET" ci-in a nuai-a mi 7 te tawh Quartet phuanin Action tawh hong thuah ciangin zaknop kisa-in Tedim gam sungah hong minthang mahmah uh hi.
Hunters Quartet-a a ki hel teng:
1. Rev. On Khan Suan pian kum 1939
2. Rev. Twel Khan Nang pian kum 1938
3. Rev. Son Do Cin pian kum 1944
4. Rev. On Kho Zam pian kum 1942
5. Pa Zam Kho Pau pian kum 1943
6. Pa Vungh Lian Nang pian kum 1947
7. Pa Gin Khan Kham pian kum 1950
( Hih a minte uh Amau' gelh dana ki gelh ahi hi)
Zogam sung mun tuamtuam-ah lasa-in vak kawikawi uh a, siam lah kisa, zaknop lah kisa-in amau' hun lai-in Zogam sungah na minthang mahmah uh hi. Negro te etteh a ki phuan ahih mah bangin Negro te sun dingin la a sak ding uh teh amai belmang nuhin a mit bek uh tee kakakin Action tawh hong sak uh pen thupi ki sa-in kei bang tu ding ka mitkha-ah om lai hi.
1967 panin 1973 kum dong kum 6 sung Pasian' min tawh na ki pia uh a, tu-in Rev. On Kho Zam (USA) lobuang a dang teng in a phat uh Pasian' angnuam hong zuat san khin ta uh hi. Amaute phawkna lianpi tawh a lasak uh kaikhawmin Pa Sian Lian Mang tung pan dawng 7 ngah ka hih manin amaute ka phawk luatna leh ka pahtawina-in a mualsuang dingin hih Video tom ka bawl sak ahi hi. Pa Sian Lian Mang (Sia On Suan' tapa neu pen) Mangpi tungah zong ka lungdam mahmah hi. A dangte zong hoih thei tak hi ven hih teng bek a ki ngah suak hi. Topan a suak a khakte uh Thupha hong piak sak ta hen:
Phawkna lianpi leh thupi sak mahmahna tawh:-
Thang Siamlian
Phaiza

[@esthercing1233]

La te zanop thei lua ei Sia ❤️🎧

[@luanmuankim6025]

Ka pi in a sak ka zak ngei pen hi ei “Inn ka nei “ la pen. Original ka zak cil