任白 靚版牡丹亭驚夢之幽媾 (Part 2 )

（麗娘慢的的百感牽懷，微微搖頭飲泣介白）唉呀......相公......柳郎......公子......（乙反木魚）唉，未閉西窗容我講句傷情話。宋玉都應憐薄命花。決不是秋風秋雨催人嫁。當解花有根原玉有芽。（夢梅白）小姐，我知道你係一點冰清，不是亂紅衰柳既，咁到底小姐你......（麗娘續唱）麗娘亦有千金價。我係出黃堂太守家。劫餘尚記我既爹娘話。（啾咽介）佢話我係崑山良璧玉無瑕。（泣不成聲禿頭花）唉，祗為驚夢遊園，空累我爹娘掛。（慢的的回憶爹娘逐漸悲介）（夢梅食住慢的的感悟介白）下，驚夢遊 園......遊園驚夢......哦（中板下句）一句驚夢遊園，一段丹青畫戀，根深蒂固早連芽。當日在柳川，曾夢會一佳人，小立在梅花樹下，佢招手問 姻緣，夢醒難再續，夢梅兩字我為記情花。燈下看丹青，執手問嫦娥，嗟莫是夢中人也。（一才收）（麗娘食住一才向夢梅點首而泣介應白）係（夢梅亦相對飲泣介續唱）唉呀，卿果是夢中人，我是黃梁客，小樓是引渡既仙槎。倩丹青作良媒，雖未有十斛量珠，望他日文章有價。不在梅邊在柳邊。若許夢梅能折柳，做一個蟾宮客耀才華。。（花）我帶著一表寒酸，兩袖清貧，拜上黃堂談婚嫁。（麗娘為難介又微微搖頭介白）慢…...（花下句）你休向堂前求父母（一才）（夢梅白）哦，莫非宰閣嫌貧呀。（麗娘搖頭白）唔係（續唱）我恐觸親心會淚如麻。（夢梅白）咁梗係太守堂中，不容一個白衣女婿哩。（麗娘難搖頭介白）唔係哩（續唱花上句）冷香閨，三載悄無人。（夢梅白）小姑居住梗係悄無人啦。（麗娘難於解答，淒然輕輕頓足介續唱花半句）剩牙床蛛網塵封殘月下。（向梅搖手表示勿去）（夢梅嘆息介花下句）唉呀，哦重估話花徑不曾緣客掃，待郎採折武陵花。花是有情花，嗟我未成名終是假。（過位小立芭蕉之前垂手無語介）
（麗娘心不忍叫白）柳郎...柳郎，你誤會我囉，我唔係咁既意思既，唉（起排子頭白頭吟引子）（麗娘含情如怨如慕，如泣如訴，輕輕走埋牽夢梅衣袖，復開台口的的起小曲白頭吟）痴心經已贈君，休要弄碎情芽，麗娘心千般痛呀，請對奴笑番下。（白）柳郎，我要你笑。（夢梅向麗娘破啼一笑介）（麗娘序白）乜笑得咁肉酸既唧，我同你有生死之情，梗願訂生前之約既（曲）嗟我冰雪身都已經硬化，似易散既雲霞，不堪提往事，真難言說話，呀，借燈謎，我願君你權度下。（指秋燈食住序白）咁啦，不如我打個燈謎你猜下好嗎？你聽住叻，燈已滅，緣已絕，待等君來臨秀穴，如今都仍是半明滅，你諗下，你明唔明白？（夢梅懵然搖頭介白）我...我唔明白。（麗娘續白）你諗真下啦，唉，點解你個人咁聰明，而家忽然會咁蠢既呢，唉（續唱白頭吟）妾長眠柳蔭，蓋面憑絳紗，在梅林夜聽秋雨，任由它飄飄向墓洒，一坏冷土是我家，風吹雨打（寶子回頭玩）（白）柳郎，咁你明白未唧？（夢梅不明白）我...我真係唔明白呀。（麗娘續白）本來我同你情意正濃，我都唔想講你聽既，但我而家講到咁明，乜你都重未明白咩。（夢梅白）什麼秋燈，什麼夜雨，盡是閨門傷春之句，咁我又猜下啦。（一路踱一路念）燈己滅，緣已絕......（最良拈燈食住寶子上偷聽介白）書齋都燈已滅，何以對樓情未絕呢，嚦嚦鶯聲殘樓月。哼，你慌唔係個個壞鬼書生發寒熱咩，如果唔係呢，就梗係收埋個小道姑係裡面談風月定叻，好，等我閱你一閱，若果真有其說，你都幾難走脫（一搖三擺上樓敲門食住三才白）開門…開門。（夢梅食住三才白）邊個...邊個？（最良白）係我，送茶黎。（麗娘台口自然自語介白）哦...我認得叻...係我地陳老師既聲音黎既。
（夢梅大驚執麗娘口古）弊叻...弊叻...麗娘，你係太守千金，我係秀才落拓，兩人都要顧體面架o番，若果洩漏春光，豈不是惹人笑罵。（麗娘笑介口古）你咪咁傻啦，你睇下冷月照人，秋燈放亮，無路可逃，我避無可避架，你不如索性去開左度門啦。（夢梅更茅介口古）唉呀，開門喎，得了既咩，男女授授不親，何況斗室幽歡，甚於瓜田李下架。（麗娘忍笑不唆介口古）唔怕哩，自古話有緣千里能相會，無緣對面都不相逢架，我見佢，佢唔見我既......（夢梅不明介白）點解佢唔見妳呀？（麗娘應白）係...睇下...佢蒼蒼白髮叻o番，咁梗係老眼昏花啦嘛，去啦...
（最良門外白）喂，開唔開？唔開，我就撞門而......（夢梅急白）開緊叻...開緊叻
（最良白）緊...開緊，哼，幹得好事呀...做得好事（拈燈慢的的一步步照梅下芳苑，後向蕉樹下照介）（最良聽到女子笑聲）做咩呀...做咩呀，邊個笑？（夢梅急應白）咪我笑囉，嘻嘻...嘻嘻...（最良白）唔係...係你笑得咁肉酸既，頭先寧寧舍舍笑得好好聽既，響下面黎既，等我落去睇下。（夢梅大驚白）冇人呀......（最良白）乜冇人呀，我要照一照咋......（夢梅看見麗娘大驚，發抖，向麗娘做手關目表示使其速趨避介）（最良眼看見梅所向之地秉燭埋三照介）（麗娘食住三閃介）（夢梅以為必見麗娘台口戰慄不敢看介）（最良白）喂...喂...開黎...開黎（口古）我睇你呀，唔係有多少神經病，你都梗係故弄玄虛想遮瞞我定叻，喂...喂，我明明聽見間房裡頭有嚦嚦鶯聲，你睇你梗係收埋個小道姑係西窗共話哩。
（夢梅口古）陳老師，你千祈唔好咁講呀，小道姑係一個出家人，持齋拜禮，我係讀書人，你唔好玷辱了百練袈娑呀。（麗娘食住此介口古掃落花盈握，輕盈埋洒於最良面前，又輕盈走開介）（最良口古）奇叻，點解呢？諗諗下我身前又冇花，後面又冇花，點解有係頭殼頂一片片咁飛落黎...唔...呢度唔係狐舍，就鬼墟，想落有的可怕。
（夢梅口古）唉，老師，呢間係南棲，就唔係狐舍，芳苑，唔係鬼墟，不過係你老人家疑心生暗鬼唧，邊度有事幹得架，留去早的抖啦，何必枉作搜查。。
（最良笑介白）你慌我怕鬼咩，我幾廿歲唔怕鬼既（花下句）我係老儒生懷中藏古玉（一才）批夜卷，掌上有硃砂。
（麗娘聞言驚慌閃在梅後邊介）哦
（最良花）等我照一照芭蕉樹，閃一閃映泉燈，忙忙解玉燈頭掛（解玉掛於燈後，欲向蕉樹照介）
（夢梅以身攔麗娘三阻介鑼邊風起，麗娘避入畫旁卸下即起清煙一縷介）
（最良口古）喂...喂，秀才黎...黎，我明明見到一個影子閃在你身後，點知我一照，佢就好似化作一縷煙咁，咦，好似入左幅丹青畫裡面（著力一點）喂，呢一幅到底乜野畫黎呀？
（夢梅不明介白）點解忽然間唔見左佢呢？（驚魂未定坐於石鼓上喘息介口古）老師，我而家實在都神昏智亂叻，你...你自己埋去睇真下啦。
（最良喃喃自語白）梗睇啦，哈...明明係有一影子縮左入畫黎既，唔通古畫成精......（埋看重一才慢的的由啾咽轉大哭介）
（夢梅愕然白）咦，老師，點解你見幅畫會喊起上黎呀？
（最良乙反木魚）老淚縱橫聲咽啞。丹青畫的是 麗春花。。立雪程門真聲價。累得我飯後尋思午響茶。。麗娘對我情非假，教我如何不想她。。喂，你幾時偷入靈台下。何解你盜取描容掛在衙。。（怒白托寶子） 柳夢梅，我以為你係一個寒酸既秀才，點不知你係一個脂粉客，你千唔該，萬唔該盜取小姐描容，掛在疏簾自賞，你盜得描容，自然會勾三搭四（介）我正話明明聽 見有女子之聲，緣何不見女子之面，唔駛審，你梗係收埋個小道姑既（一才）
（石道姑引韶陽女聞聲食住寶子上介）
（夢梅食住一才搖手作否認介）冇哩
（最良迫前一步怒介白）冇呀，我明啦，小道姑梗係啦，佢又生得青靚又白淨，今日日間在梅花庵觀你經已同佢眉來眼去（催緊）柳夢梅，我限你在半個時辰，將呢個小道姑從樓內交出，否則我就拉你上道錄司衙，問你一個穢亂庵堂，勾搭道姑之罪，拉你...（作狀欲拉介）
（石道姑韶陽女食住此介口推門而入下樓介）
（最良見女等從外入瞠目啞口介）
（石道姑口古）陳齋長到底柳秀才有乜野事犯親你，令到你夜扣南樓連宵叫罵。
（最良吶吶不答介）
（韶陽女口古）陳齋長，我方才係小樓之外，聽見你右一句小道姑，左一句小道姑，到底小尼姑有乜野同你過唔去呀，你唔應該污辱了清白人家。。
（最良口古）石姑，今晚呢件事，非同小可，我適間明明聽見南樓之內，細語喁喁，鶯聲嚦嚦，到底呢個小道姑係房內而出，就係房外而入呀？你話晒上左年紀既人，應該講番句老實話呀。（韶陽暗啐羞介）
（石道姑正容口古）老冬烘，自黃昏起，小道姑都陪我在經堂敲誦，一直到現在陪我到黎，未有離開我半步，你都分明係無風作浪，過事喧嘩。。（拂袖介）
（夢梅白）老師，咁你明白啦，你冤枉人呀。
（最良白）咪嘈，哈...奇叻（過位執石姑）芳苑無人，莫不是樓中有鬼...唔係...唔係（口古）假如我有冤枉佢，我就甘受雷劈天打。 嗱石姑，除左妳呀...妳兩隻道姑之外，太守衙內何處更有嬌娃呢。。舊時陣都重話有...重有個杜麗娘小姐呀，可惜佢都死左三年長（一才）
（夢梅食住一才由石鼓跌落地驚介）哎呀
（最良續口古）三尺桐棺都怕已隨風物化。你驚哩...驚哩，芳苑都更無紅粉在，莫非天女無端夜散花咩。。
（石道姑白）秀才你唔駛驚慌，陳齋長，冇謂多事叻，咁夜搔擾口地清雅唔好呀，求其事幹過得去就了囉，休息下罷啦。
（韶陽女對夢梅本有愛心，乘機走埋扶起梅介白）秀才，睇下你呀，慌到手騰腳震做乜野呢。
（石道姑白）小道姑，明日就係杜小姐三年忌日，理該在佢墳前化些紙帛，你同我入去早為打點，呀秀才，你休息下，陳齋長，唔好多事叻，返去書齋啦。
（最良白）豈又此你，你快的交出黎呀，唔交出黎，我梗拉你上道錄司衙既，你記住黎...
（石道姑、最良與韶陽女上樓同下介）
（夢梅頹然坐下沉花下句）唉呀，說什麼丹青配，祗不過係霎眼煙霞。。
（鑼邊起風吹熄燈介）
（麗娘食住鑼邊在什邊樓畔花蔭卸上）（先起清煙一縷，最好能從舞台底慢慢昇起，即氣芬更好，起雙星恨譜子上前細聲叫白）柳郎...柳郎...（牽其衣袖介）
（夢梅仰視麗娘重一才大驚介）哎呀...哎呀...妳...妳
（麗娘見狀慢的的關目悲咽口古）柳郎......莫非你猜透了燈謎，不用麗娘點化架？
（夢梅頻頻點頭但仍發抖口古）原來你講燈...燈已滅，緣已絕，原...原來你係一隻...一隻夜鬼回衙。。
（麗娘的的 一才反應用沉鬱之聲白)下，夜鬼回衙呀...，唉（行開兩步，帶點自愧心情，起姬花下句）艷質久塵埋，冷落泉台下，身在桐棺伴冷霞，由來鬼物招人怕，試問誰甘夜接鬼回衙。。（悲泣介）一夢死三年，一見了三生，祗剩得一段人鬼相思留...留佳話。。（欲下介）
（夢梅連隨跪前，緊執麗娘白）哎呀，麗 娘...麗娘，妳唔好行（起小曲人鬼戀（諧另錄））麗娘...係鬼也不驚怕，我抱膝慘喚麗娘向地爬。你為我死，香銷鏡花，我哭句曲終線斷空抱琵琶，拜艷屍 抱落霞（寶子重玩懇切痛白）麗娘...麗娘，我同妳夢中生情，妳為我而死，生不能為我婦，死亦當為我妻，麗娘妻，你...你稍候我片時，待我復上小樓懸樑 自盡，那怕陽間難配偶，我地地府都可成家...（欲上小樓介）
（麗娘阻止介白）哎呀，慢...（小曲人鬼 戀，前譜唱）夢梅...不枉我傾心也，抱君慘喚夢梅血淚瑕。你肯為我死，施恩更加，我不怨天不怨地，反覺榮華，復活花再萌芽（寶子續玩一路一路白）柳 郎...柳郎...如果你唔講出呢一番衷心說話，我就算係雖可回生，亦羞慚復活囉，柳郎夫...（略掩袖遮掩羞介）
（夢梅應白）麗娘妻...
（麗娘續白）我當年雖為落花驚閃而亡，猶幸十殿閻君佢翻檢姻緣部 冊，話註定我同你先有幽歡（介）後成明配...所以雖登鬼錄，我都未損人身。今日我陽錄將回，陰數都已盡囉。日前為柳郎而死，我今日為柳郎而生...（懇 切地催快）柳郎，你若能在明日未過辰牌剜碎桐棺，我同你都尚可再續姻緣之份呀。
（夢梅半信半疑介白）麗娘...麗娘...世間上只有精靈不死唧，邊處會有三載回生之理呀？
（麗娘聞語緊執夢梅介白）柳郎，我點會呃你呢， 嗱，麗娘尚有叮嚀我願君記取，你既以我為妻，勿誤我辰牌時份，否則過了冥期所限，即今生（一才）亦難再有相見之日矣。（聞遠處雞啼）唉呀，我...我要走叻。（急下介）
（散天露微光介）
（夢梅叫白）麗娘...麗娘妻...麗娘...（花下句）等我破棺重接再生花。（手忙腳亂，拈花鋤，急從衣邊下介）（落幕）