Vložit
- čas přidán 21. 08. 2024
- الشكل و الجسم الخارجي: شكلها شبابي وكبودها عالي و صاجها تقيل .. أنا كان معايا سوزوكى سويفت كان أى حاجه تريح عليه الصاج يتطبق .. بجد الكورسا فرق شاسع .. كذا مره أتحك أجيب قطنه و ميه وترجع زى الأول .. يعنى الصاج مبيدخلش لجوه .. حتى لو رفعت الكبود بتاعها هتلاقيه أتقل من عربيات كوري كتير أكبر منها حجما.
الأوبل كورسا سيدان فى مصر موديلات من 2003 الى 2007 .. نفس الشكل .. بس موديلات 2003 و النص الأول من 2004 الايريال ورا .. النص التاني من 2004 الى 2007 الايريال قدام.
الموتور : الموتور 1600 سي سي .. 101 حصان .. MPFI .. التسارع ممتاز جدا و موتورها ناعم و صوته قوى لما تقرص عليه .. و معمر و قطع غيارة كلها متوفرة و سعرها مناسب .. و فى قطع غيار مشتركة مع الدايو لانوس .. كمان الموتور مصفح من تحت.
استهلاك البنزين: متوسط بالنسبه لعربيه 1600 سى سى .. يعنى متوسط 200 كم/الصفيحه جوه البلد .. و ممكن يوصل ل 250 كيلو/صفيحه فى الطوالي على سرعة 100 كيلومتر/ساعه.
الكماليات: في منها موديلين GL و GLS .. ال GLS جميع الكماليات مانيوال .. تكييف .. سنترال لوك .. باور ستييرنج .. 4 زجاج كهرباء .. 4 وحدات رفع .. مرايات كهربا .. 2 مفتاح ريموت .. ايمبوليزر .. الازاز مبيقفلش لو فى حاجه بتعوقه .. أحزمة أمان أماميه و خلفيه .. و أحزمة الأمان الأمامية متحركه .. خاصية dead lock بتمنع فتح العربية من جوه لو مقفولة بالسنتر .. شاشة بيانات فيها الوقت و التاريخ و درجة الحرارة الخارجية .. السنتر بيقفل عند سرعة 30 كم .. النور بيطفى بعد نص ساعة لو سيبتة منور .. مرايات فى الشماسات .. زجاج الابواب بيفتح 5 سم لما تفتح الباب عشان تفريغ الهوا .. فتح الشنطة و تنك البنزين كهربا .. التحكم فى ارتفاع كرسى السائق .. لمبات مفاتيح زجاج الابواب مضيئة.
النظام الصوتى: كاسيت و أربع سماعات بلوبونكت و صوته ممتاز .. و الايريال ثابت فى سقف العربية من ورا زي معظم الألماني.
مساحات التخزين: أربع حامل أكواب .. باكيتات فى الابواب .. درج التابلوه واسع جدا و مضاء و فيه حامل أكواب و مكان للقلم .. مساحات تحت الكاسيت و فى التابلوة على الشمال.
الثبات: ممتاز بس مش زى الفيكترا طبعا .. أنا جبت بيها 180 وواحد صاحبى جاب 210 .. و العربية كانت كويسه.
العفشه: متوسطة النشوفيه .. يمكن عشان يخلوا العربية ثابته .. و يمكن عشان العربيه كنزة شوية .. ويمكن عشان الكاوتش عندى ماكسس (ناشف شوية) .. بس عموما العفشه معمرة جدا .. يعني أعرف ناس كتير عندهم العربية من أكتر من 5 سنين و عمره ما غير حاجه فى العفشه .. و نادرا لما تروح تربط عفشه .. و العربية عموما عالية و نادرا ما تحك فى المطبات حتى لو معاك ناس.
التكييف: ممتاز جدا .. ميفرقش حاجه عن الكورى سواء فى البروده أو فى سرعة الوصول لدرجة البرودة .. و لا يؤثر على سحب العربية.
الصالون و الفرش الداخلي: مع انك تحس ان العربيه مش كبيره من بره .. الا ان الصالون بتاعها واسع .. و الفرش بتاعها كويس جدا .. و مريح .. هو موبيكا على فكرة.
العزل: العزل الصوتي متوسط .. يعنى بعد 120 بكون سامع صوت الطريق و الهوا .. انما الحراري ممتاز .. يعنى مفيش سخونية من عند الدواسات زى عربيات تانية ولا حاجه من دي .. و الكبود مبطن من جوه.
العيوب:
أنا هتكلم عن عيوب العربية المشتركة مش الفرديه .. يعني اللي حصلت مع معظم مالكي العربيه.
أولا: بتحتاج تغير اسطوانة و ديسك على فترات أقرب من العربيات التانيه .. يعنى حوالى 50 ألف كيلومتر .. و بيختلف حسب طريقة سواقتك .. أنا غيرت الاسطوانة و الديسك أول مرة عند 90 ألف كيلومتر.
ثانيا: زي معظم العربيات الأوبل .. البوهيه بتاعتها وحشة جدا و بتكلح لما تتساب فى الشمس .. واحد صاحبى معاه عربية كحلى زى عربيتى و مع انها أحدث الا انها جربانة جدا .. أنا دايما بغطى عربيتى لما أركنها فى الشمس عشان المشكلة دى .. و المشكلة دى موجودة فى معظم الأوبل.
ثالثا: طارة الدركسيون بتقشر .. و الجلدة بتاعة فرامل اليد بتقشر برضه .. و دي مشكلة فى الموديل ده و في أوبل كتير برضه .. بغض النظر عن المشكلتين دول .. الفرش كويس جدا و الطابلوه كويس و مبيشققش.
رابعا: ملف كمبروسر التكييف بتاعها بيبوظ .. و دي مشكلة حصلت عند ناس كتير .. لدرجة اني لما رحت أصلحه .. الراجل أول ما شاف العربية قال لي أكيد ملف كمبروسر التكييف .. على فكرة بنسبة 90% مقاومة فيه هي اللى بتبوظ و بيصلحوها فى ديافيا .. أنا كنت عامل موضوع عن الملف ده لما باظ عندي
خامسا: ماسورة المياه بتاعتها بتتشرخ .. و دي ممكن تلاحظها فى الأول لو لقيت المياه بتنقص .. ماسورة المياه الأصلية
سادسا: عامود الكامه اتكسر معايا .. و كنت متخيل ان دي مشكله فرديه .. بس و أنا فى الحرفيين كان في ولد واقف جبني كان بيشتري عامود كامه برضه لعربيته كورسا سيدان .. و كذا واحد سألت عنده قال لي ان المشكلة دى متكررة الى حد ما .. عامود الكامه بتاع الللانوس بيركب عليها على فكرة.
سابعا: بيتكون فيها صدأ فى اخر السقف فوق الكاوتشه بتاعة الزجاج الخلفي .. و دي هتلاحظها لو بصيت على أي عربيه كورسا سيدان.
العربية معايا من خمس سنين بصراحة عربية ممتازة وحمالة قاسية بس اهم حاجة عايزة اللي يفهما مش يسيب نفسة للصنايعية زيها اي عربية لو ايدك فيها دايما مع ناس بتفهم بتبقى عربية تحفة
قطع الغيار متوفرة والاسعار اية؟
@@salahcena6098
قطع الغيار اسعارها معقولة في منها الصيني والالماني والايطالي والاستعمال وليها بدائل بتركب من اللانوس والافيو والنوبيرا بس يفضل حاجتها الgm الالماني اغلى شوية بس معمرة جدا والعربية ناجحة اوي ومنتشرة في القاهرة والاسكندرية ولا اعرف باقي المحافظات
امثلة لقطع غيار
قلب طرمبة البنزين ب 350 ج بتاع اللانوس
جوان قلب طرمبة البنزين 80
غطاء تكهيات للموتور استيراد 400
سير مجموعة صناعة انجليزي 250
سير تقسيمة 200
موتور مساحات 250
طرمبة مياه صنعة انجليزي ب500
تيش اسكترا 300
بيض الطرف 400
مساعدين امامي مايلي الماني 2400
وفيه تركي ب1500
طقم ديسك واسطوانه فاليو كوري 1500
حساس ايديل بتاع اللانوس صناعة صيني 190
موبينة استيراد 700 والجديد بتركب بتاعة الافيو
اسلاك بوجيهات بتاعة اللانوس 250
والمفاجأه الفتيس المانيوال بتاعها قبل غلاء الاسعار كان بيتراوح سعرة من 700 الى 1200 بس ودة لانه مركون عند بتوع قطع الغيار مش معلهوش طلب لانه معمر جدا
العربية على الفيس ملهاش غير جروبين منها جروبي انا عاملة للعربية اسمة اوبل كورسا سيدان (corsa c) ادخل شوف الاسعار بنفسك
@@Ahmedahmed-xm7vi متشكر جدا
لو سمحت حضرتك لو فيه قدامى اوبل فيكترا اتوماتيك ٩٥ وكورسا ٢٠٠٤ ايهما افضل السعر متقارب جدا مع العلم انى اوبل فيكترا اتنين اير باج وسنتر كانت معاقين وفكت فلو سمحت ايهما اختار
سعه الشنطه قد ايه لو سمحت
كام السعر المطلوب للشراء
موفق
حضرتك نسيت تتكلم عند عطل الكونترول بتاع العربية
كان نفسي اعرف نقطة ضعف العفشة عشان غيرت المساعدات و قواعد العجلات المثلثة الكبيرة الأمامية و لسه بأشعر بالإهتزاز و الرعشة علي الأرض الخشنة كإن فيه كوتش عايز يتغير
احتمال كوتش او ترصيص عجل
بفكر اشتريها بعد التقرير
بالتوفيق ان شاء الله
كام السعر
ممكن تلفون حضرتك ضروري لو سمحت
يا جماعة اشتريها للشغل ولا لا
هي عربيه جميله بس خليك في الاسترا احسن في الشغل تستحمل معاك
الصدا دا مش برومة
ممكن تلفون حضرتك
موفق
الكلام بتاعك متاخد بالحرف من نايل موتورز
@@ahmednour9275 كلام حضرتك مظبوط انا فعلا بثق جدآ في الموقع دة خصوصا اني مازالت راكب الاوبل كورسا تحياتى لحضرتك
اجد وش الكاسيت فين لانه انسرق
وعايز اشحن التكييف فين
@@mahmoudarafat1712 افضل غير الكاسيت صعب تلاقيه هات كاسيت استيراد نفس الفيش عند بتوع الأوبل بالنسبة للتكييف اي حد بتاع تكيفات ممكن يشنحهولك
@@Elzghaba جزاك الله عنا كل خير