बैसाखी व महर्षि वशिष्ठ के जन्मदिन की हार्दिक बधाई एवम शुभकामनाएं

विपाशा नोई रा किनारा
थोढै उथडै नै ग्रां हमारा
श्री रामचन्द्र ता शिवजी रै
मंदिरा संघै
ऋषि वाष्टै रा मन्दिर प्यारा
लागी रौंहदी रौनक सदा
ऋषि वाष्टै रा रौथडू बडा प्यारा
ऋषि शक्ति मुनि रा
बापू प्यारा
ऋषि पराशर संघै
हेरिया सा मिलन न्यारा
तेरी जांचा नै जैवै एजा सा
देऊ नाग
हौआ सा तैवै नजारा हेरना प्यारा
ऋषि वाष्टै रा रौथडू बडा प्यारा
तू लोभा शोभा रा देऊ सा माल्का
तेरै गढै रा अनोखा नजारा
नायदै एजा सा
कुल्लू देशै रै देऊ देवतै सारे
तेरा तीर्थ मालिका भृगु धारा
जैवै जा सा नायदा भृगु वै देवा
वौष्ट ठेली न हौआ सा दिव्य नजारा
ऋषि वाष्टै रा रौथडू बडा प्यारा
बशाखै रै साजै वै
तेरा जन्मदिन ऋषिया
ढाई घड़ी होंदी तेरी फागली ऋषिया
ज़ोरै फुला संघै
सजदा तेरा रौथडू प्यारा
तेरै मन्दिरा आगै
महामाई रा स्थान
भोरि नै वेशिया तेरै
महामाई बौंडदी सुख शांति अन धन
फुला रै डोलरू साही‌ वौष्ट ग्रां म्हारा
ऋषि वाष्टै रा रौथडू बडा प्यारा
कथा तेरी ऋषि टोली री अनोखी
श्री राम रा गुरु होना सौभाग्य देवा थारा
सौता ऋषि नै तू एक देवा
मेहमान रौंहदै वौष्ट ऐंन्दै
तेरै मेहमान देऊ देवतै
म्हारै ग्रांई रै घौरा देऊलू सारै
की अन्न की धन देऊवा
सब किच्छ तेरा धिना दा सारा
ऋषि वाष्टै रा रौथडू बड़ा प्यारा
सदा हौसदै तेरै रौथा रै मोहरू देवा
तू म्हारै सुखा रा साथी
दुखा रा म्हारै तु देवा सहारा
किछ चकदै तोभै धपै री बौती
हाऊ पुजदा तौभै मनानै माल्का
सही राहा नै रखी देवा मुंभै तू सदा
उंचा लोडी रखू आपणै ग्रां रा ना
खुश रखी सदा ग्रां म्हारा
तेरी कृपा रा देवा अनंत न्यारा
ऋषि वाष्टै रा रौथडू बडा प्यारा