Speca dhe domate bio ne tregun vendas dhe te huaj

Eduart dhe Merita Xhelo, bashkëshortët nga fshati Petov në Fier, prej më shumë se tetë vitesh kultivojnë perime në serat diellore. Aktualisht, këtë sezon kanë kultivuar domate 'Roze' dhe specin e kuq 'Kaptur'.
“E kemi nisur punën vetëm me një dynym serë,” tregon fermeri, “ndërsa sot kemi arritur në 3.5 dynyme dhe për çdo sezon arrijmë të marrim 20 deri në 25 tonë perime, të cilat i shesim në tregun vendas dhe në pikat e grumbullimit që i eksportojnë në vendet e BE-së.”
Edhe pse shpesh herë janë përballur me vështirësitë e tregut, fermerët nuk e kanë braktisur punën, por kanë punuar dhe kanë konkurruar fort me cilësinë e prodhimeve të tyre bio, duke siguruar kështu një treg të sigurt.
Mungesa e krahut të punës pengon për të shtuar sipërfaqen me sera, pasi në zonë është vështirë për të gjetur punëtorë. Fermeri dhe bashkëshortja e tij e kanë të pamundur të përballojnë sipërfaqe më të mëdha vetëm me forcat e tyre.