TILUFA @@@@@@ Assouane mohamed TALUFT

A ṭṭir icebḥen nesru
Ttxil-k aweḍ ar leɛrac
Γiwel ili-k d amenzu
Gar-asen sswab ulac
A ṭṭir tallit ur as-kennu
Siweḍ-asen rreḥma i warrac
Ay iles-iw ttxil-k, qḍeɛ
Lfahem ur t-neǧǧeɛ
Ala win yellan d ḍḍallem
Tikkelt-a daɣen nettwaxdeɛ
Xedɛen-aɣ wat n ṭṭmeɛ
Mi d-nekker i lbaṭṭel ad t-negzem
Ur nufi ḥedd d amcafeɛ
Tagmat mi twezzeɛ
Yeḥzen win yellan d lfahem
Ma d Aqbayli bu uskulleɛ
Yettḥibbin nnǧeɛ
Di ssef n udabu yekcem
Dda Saɛid yettuberdeɛ
D ccwal i yezreɛ
Akken i as-d-nnan, ad yexdem
Isem-is di tudrin icaɛ
Ur d-yegli s nnfeɛ
Fell-as, i d-ɛebban d lefḥem
Dda Saɛid yettuberdeɛ
D ccwal i yezreɛ
Akken i as-d-nnan, ad yexdem
Ass-agi iban-awen lḥal
Ferzen-t lɛeqqal
Anwa i t-yerran di rrif
Teẓram d nnuba i yiɣyal
I nehhren s wuffal
Kemmlen i ucerrig ɣezzif
Ala nettwali deg yimehzal
I yebran i leḥlal
Ass-a ffɣen-d i ttesrif
Nnan-d d laxer n zzman
Yeqqel ucercur d lɛinser
Anebdu yefka-d aman
Ur nufi abrid ad nwexxer
Acḥal d ilemẓi ay nɣan
Tilelli ur as-iban later
Nettwarhen melba lmizan
Tudert iqudam n ccer
Yefka-d ccerṭ buɛednan
Netta d akli n lɛesker
Uyeḥia ssuq-is yewɛer
Yeḍla i tudrin qeḍran
Belɛid yid-s i iqemmer
Belɛid yid-s i iqemmer
I Lwennas menhu i t-yenɣan ?
D argaz yemmut s leɣder
Lwennas menhu i t-yenɣan ?
D argaz yemmut s leɣder
Ma d win i iḥuza wawal
Ziɣen d lexyal
Yenna-d tidet d ttnasif
Γef ttura yeqdec acḥal
Cekren-t izumal
Tlata u settin d amukrif
Ass-agi ifut-it lḥal
Yesnegzam akk timsal
Γas Ssi Lḥusin d ccarif
Ass-agi ifut-it lḥal
Yesnegzam akk timsal
Γas Zzi Lḥusin d ccarif
Γas Zzi Lḥusin d ccarif
A tarwa !
A tarwa n leḥlal
I yeḍran yid-nneɣ mazal
Tixidas, yerna lbaṭṭel
Γef tidet mi neɣfel
Yeffled zzhir i umnar
Aqbayli iɛemmed, yedderɣel
D lɛar i ifettel
Iferreq-it ɣef tudrin d tisɣar
Ayen akka nesburr ddel ?
D tagmat i nmessel
Times teṭṭef ijufar
Ayen akka i nesburr ddel ?
D tagmat i nmessel
Times teṭṭef ijufar
Aseggas-a neɣ qabel
Ur cukkeɣ ad tbeddel
Alamma yeṭṭerḍeq uɛbar
Imir ad d-iban lefḥel
D mmi-s n lasel
Γef tudrin, sswaḥel
Ad nekkes ɣef wallen aɣebbar
Imir ad d-iban lefḥel
D mmi-s n lasel
Γef tudrin, sswaḥel
Ad nekkes i wallen aɣebbar
Nerfed allen s igenni
Neṭṭalab Rebbi
Neḍmeɛ rrbeḥ s wuran
Aqbayli mi ara yeɣli
Ad ak-yini d Rebbi !
Ma yerbeḥ ad ak-yini d nekki !
D tismin i ɣ-izedɣen
Armi i aɣ-teɛreq tikli
Ireggel-aɣ yiswi
S wurfan nettemxasam
Icudd-aɣ wurrif s ifri
Melmi ara d-naki ?
Ad nefk nnuba i win yeɣran
Ad nawi abrid n tmussni
Ad neldi iẓri
Ad nemseɛqal d atmaten
Tebrek, ad as-nelles am wulli
Aqbayli ad d-yaki
Tebrek, ad as-nelles am wulli
Tagmat ad as-nerr ifadden
-- Taluft --
♥♥♥ Mohamed Assouane ♥♥♥

[@nassimkaddour2625]

Poesie riche