Pi Dimkhoching Vuina Programme

MRS. DIMKHOCHING @ CHINGNU’ TANCHIN TOMKIM
Pianni : 5th September, 1935
Pianna mun : Hansip
Pa min : (L) H.Vungkhothang, Compounder
Nu min : (L) Vungkai
Pasal neih ni : 28th December 1960
Pasal min : T. Thanchhung, Chief Of Pearsonmun
Laizilna/Sepna
1. Class 1 (A,B,C,) Kaihlam 1945
2. Class 11 & 111 Hansip 1946 - ‘47
3. Class 1V- VIII Mission Compound 1948
4. G. Nursing Guwahati 1954 - ‘58
5. Matric Guwahati University 1967
6. Bachelor of Arts(BA) Guwahati University 1975
Training dia kuan na te :-
1. Paediatric Nursing Course at College of Nursing, P.G.I. Chandigarh - 1977
2. Attended Course in: (i) Continuing Education on nursing management of child health care and service. (ii) Continuing Education on Nursing care records for nursing audit at Rajkumar Amritkaur College of Nursing, New Delhi - 1986
Sepna :
1. Staff Nurse, District Hospital, Churachandpur 1960 apan
2. Nursing sister, do 1969 apan
3. Matron , - do- 1985 apan
Pi Dimkhoching in Pathian vualzawlna thupitak a tan dungzui in, ei
singtangmite lak ah laisiam masa pawl ahi a, Medical nursing lam ah a
tungsang pen pawl anahi hi. Huai ban ah mel leh puam ah leng vualzawlna
tang in, a nungak lai bangin melhoih a chiamteh ana hilai hi.
Amah mihin zia ahih leh mi tlawmngai leh ki-ngainiam mi ahi. Aw khauh leh
aw gum a zang ngeikei himhim hi. Aneu leh alian a pawl thei vek a, aki
sukkhak pih te’n a kianga om nuam asa uhi. Innsung leh khotang ah nuihmai, kamdam leh nunnem in a om den zou hi. A tate leh tute a dingin etton ding thilhoih tampi hon nutsiat hi. Chimawhte leh beidongte panpih a
mawhpuakna bang-a ngai in, panpihna nasep lam ah ana nak pan thei
mahmah hi. A pension tan-a asepna District Hospital, Lamka ah Matron dinmun tan tung hi. Asep sung in, anuai a semte aw gum in asal ngeikei a, a tung ua a migit dan leh siam asuah dan a gen mang mawh hial uhi. Pearsonmun khua hausa himah le uh, a sepna ziakin Lamka a medical compound ah a om nilouh ua, Kum 1977 in Pearsonmun khua ah kiktou in, huai apat in kuhkal tak leh taima takin office a kai gige hi. A pasal in a lemchang chiang in ava kha zel a, huchih louh kal in, khe in vuahzu nisa nuai ah niliap tawh kuhkal takin office akai gige hi. Amah hi Pathian tawh ki pawl den mi ahi a, thumna a ngaina mahmah a, a tate leh tute’n exam ding leh hih ding poimoh aneih chiang un thumna leh vualzawl na tawh a khahkhe gige hi. A lametna Pathian a koih mi ahi. A Bible chang deih gige khat ahih leh Sam 121 “Tangte lam ah ka mit ka suan tou dinga…..” chih ahi. Saptuam sungah hihtheih dandan in a hun awl neih sunsun te ah a na ki zang zel a, tua Division dan a iki khen ma tham ua, District a iki puak lai un, Lamka District Dorcas Committee ah dinmun poimoh taktak ana lenkha hi (Record a lemtan geih louh ziakin, a kum leh ahihnate kitak lang theilou hi). EBCC Pearsonmun a Dorcas Committee a aki zat khak na te :
1. 1981 apat 1991 sung kum 10 vingveng Secretary hihna a len.
2. 1992 in Assistant Secretary hihna a len.
3. 1993 apat 1995 sung Secretary hihna a len.
4. 1996 sung Assistant Secretary hihna a len.
5. 1997 sung Committee member in a pang.
6. 1998 apat 1999 sung Vice President hihna a len.
7. 2000 apat 2010 sung Committee member in a pang.
EBC Headquarters ah leng Dorcas Committee ah a hih theih bangbang in
Pathian a dingin ana ki zang hi. (A detail record aki muh theihlouh ziakin
a kum leh a hihna te ki taklang theilou hi) Kum 2016 in stroke honnei a, JNIMS ICU ah hun bangtan hiam etkol ahih nungin, inn lam a treatment sunzom dia discharge ahi a, huai nung in a ngaihtuahna nidang bang thei non taktak lou in hong om hi. Nikum masa lam a kipan in houlim pih theih louh khop in a ngaihtuahna hong buai deuhdeuh a, atup pen gen zawm theilou in, kamkhat khong gen in hong khawl vengveng zel a, aban ding i behlap sak chiang in “e huai eive ka gen ut” honchi thei zel hi. Date 15th February, 2024 in angeina dan in alupna ah lum in, nitaklam ann ne dia ki-phawng zoulou in, CT Scan a kilaak leh akhuak a sisan lut ana hi a, huai nung siah khawphawk lou in om den hi. Khawphawk lou a om himah leh, amah ittu te’n duattak leh ittak a, bangtan hiam a kikep nung un, Pathian hunseh hongtung in, nat leh sat thuak
nonlou dingin, Toupa Jesu Krist kiang ah, tangtawn a teng ding in,
Sintawpni (7:40 A.M), 8th March, 2024 in ana pai masata hi.