आषाढी एकादशी निमित्त भजन कार्यक्रम
सौर, २६ जुलै शके १९४६,
बुधवार, १७ जुलै २०२४
सुरुवातीला मौन आणि बरोबर ८ वाजता… “अलंकापुरी पुण्यभूमी पवित्र… “ हे मंजुळ सूर कानावर पडले
आणि भजनाच्या कार्यक्रमाला सुरुवात झाली.
ज्ञान प्रबोधिनीच्या भजन कार्यक्रमाचे एक वैशिष्ट्य म्हणजे प्रबोधिनीतल्या वेगवेगळ्या विभागातले काही सदस्य भजनं, अभंग म्हणतात आणि त्या पाठोपाठ उपस्थित सर्वजण यांच्यामागे अभंग गायन करत असतात. त्यामुळे विठ्ठल नामाचा गजर असो, अभंग असतो, सगळेजण भजनात तल्लीन होऊन जातात.
उपासना मंदिरातलं वातावरणच भक्तिरसपूर्ण असतं. यावेळी इयत्ता दहावी मुलांच्या वर्गानी सजावटीची जबाबदारी स्वीकारली होती. आळंदी ते पंढरपूर आणि देहू ते पंढरपूर या दोन मुख्य पालख्या.. त्यांच्या मार्गावरच्या मुक्कामाची ठिकाणाचं नावं आणि त्यावर छोटं चित्र अशा स्वरूपात उपासना मंदिराच्या दोन बाजूंच्या भिंतींवर त्यांनी लावली होती.
“सद्गुरूवाचोनि सापडेना सोय,” “पांडुरंगी मन रंगले | गोविंदाचे गुणी वेधले, ” “अबीर गुलाल..”, “पंढरीचा वास चंद्रभागे स्नान”, “हेचि थोर भक्ती आवडते देवा”, “पवित्र होईन चरित्र उच्चारे” इ अभंग; जोडीला अधेमधे
“जय जय रामकृष्ण हरी,” “जय जय विठोबा रखुमाई”, “ज्ञानेश्वर माऊली ज्ञानराज माऊली तुकाराम”असे गजर आणि विठ्ठलाची आळवणी करण्यासाठी वेगवेगळ्या धुनी यांनी कार्यक्रमाची रंगत वाढत गेली.
ज्ञान प्रबोधिनीचे मा. संचालक, मा. कार्यवाह, मा. प्राचार्य; इ. ७ वी ते १० वीतल्या विद्यार्थ्यांबरोबरच, माजी विद्यार्थी, वेगवेगळ्या विभागातले सदस्य, पालक यांची उत्स्फूर्त उपस्थिती कार्यक्रमाला लाभली होती.
मा. संचालकांच्या हस्ते विठ्ठलाची आरती होऊन कार्यक्रमाची सांगता झाली.
ज्ञान प्रबोधिनीची वास्तू जवळजवळ दीड तास आज भक्तिरसात चिंब भिजली होती…