کابل کې د ۲۰ میلیونو ډالرو په پانګونې سره د درملو جوړولو یوه نوې فابریکه جوړه او په فعالیت یې پیل وکړ.
لایف پَرَل د درملو په تولیدي فابریکه د کابل ښار په صنعتي ښارګوټي کې نوې فعاله شوه چې بیلا بیل ډوله درمل به پکې تولیدیږي د اسلامی امارت یو شیمر لوړ پوړو مسؤلینو د دغه تولیدي فابریکې د پرانستلو په مراسمو کې ګډون کړی وو چې یاده فابریکه یې د هیواد د اقتصادي پیاوړتیا په برخه کې مهمه یاده کړه او له نور پانګه والو یې وغوښتل چې په هیواد کې دې پانګونه وکړي.
او د درملو جوړولو د تولیدي فابریکو له مسؤلینویې غوښتنه وکړه چې په معیاري توګه دي درمل تولید کړي.
د ریاست‌الوزراء اقتصادي مرستیال وویل، باکیفیته درمل له روغتیایي اړخه د سالمې انساني ټولنې ضمانت کوي او بې کیفیته درمل بیا د انسانانو ژوند ګواښي له کمیت مخکې باید د درملو کیفیت ته پوره پاملرنه وشي.
پدغه مراسمو کې د خصوصي سکتور استازو وویل چې اوس مهال په هیواد کې پانګونې ته ښه زمینه برابره شوې ده له بهرمیشتو هیوادوالو یې وغوښتل چې خپل هیواد ته دې راستانه شي او د هیواد په آبادۍ او پرمختګ کې دې برخه واخلي.
د یادونې وړ ده چې د لایف پَرَل د درملو په تولیدي فابریکه کې ۲۰ میلیونه ډالر پانګونه شوې چې بېلابېل ډولونه درمل به پکې تولید یږي او ۳۰۰ کسانو ته په کې په مستقیمه توګه کاري زمینه هم برابره شوې ده.