မန္တလေးတိုင်းဒေသကြီး၊ သာစည်မြို့နယ်၊ ညောင်ရမ်းမြို့၊
အင်းကနက်ကျေးရွာ၊ အင်းကနက်ကျောင်းတိုက်
သာသနဓဇဓမ္မာစရိယ၊
Diploma (Bhddha-Dhamma), B.A. (Buddhism)
Dhammaduta Buddhist University, Bago ဘွဲ့တံဆိပ်တော်ရ
အရှင်ဓမ္မပါလ၏ အထ္ထုပ္ပတ္တိအကျဉ်း
“ဝိဇာတမင်္ဂလာ”
အရှင်ဓမ္မပါလသည် မန္တလေးတိုင်းဒေသကြီး၊ သာစည်မြို့နယ်၊ ညောင်ရမ်းမြို့၊ အင်းကနက်ကျေးရွာနေ ခမည်းတော် ဦးဘိုလေး + မယ်တော် ဒေါ်အမာကြည်တို့မှ ၁၃၅၇-ခုနှစ်၊ ဝါခေါင်လဆန်း (၃) ရက်၊ စနေနေ့တွင် မီးရှူးသန့်စင်ဖွားမြင်သော သားရတနာဖြစ်ပါသည်။ မတင်မိုးခိုင်၊ မောင်လှမင်းဝေ၊ မောင်ထွန်းထွန်းနိုင်၊ မောင်းနိုင်းနိုင်းဗိုလ် ဟူသော မွေးချင်း (၄) ယောက်ရှိသည့်အနက် တတိယမြောက် သားရတနာဖြစ်ပါသည်။
“ပဗ္ဗဇ္ဇမင်္ဂလာ”
၁၃၆၆-ခုနှစ်၊ တ‌ပေါင်းလပြည့်ကျော် (၁၁) ရက်၊ အင်္ဂါနေ့တွင် မန္တလေးတိုင်းဒေသကြီး၊ သာစည်မြို့နယ်၊ ညောင်ရမ်းမြို့၊ အင်းကနက်ရွာဦးကျောင်းဆရာတော် ဘဒ္ဒန္တမုနိန္ဒမထေရ်ကို ဥပဇ္ဈာယ်ပြုလျှက် ဦးမောင်မောင် + ဒေါ်ညိုကြီးတို့၏ ပစ္စယာနုဂ္ဂဟကိုခံယူကာ အသက် (၉) နှစ်အရွယ်တွင် ရှင်သာမဏေအဖြစ်သို့ ရောက်ရှိခဲ့ပါသည်။
“ဥပသမ္ပဒမင်္ဂလာ”
၁၃၇၇-ခုနှစ်၊ နယုန်လဆန်း (၁၃) ရက်၊ စနေနေ့တွင် ရန်ကုန်တိုင်းဒေသကြီး၊ မြောက်ဥက္ကလာပမြို့နယ်၊ ဇမ္ဗူအေးကျောင်းတိုက်၊ ဇမ္ဗူဥသျှောင်သိမ်တော်ကြီးတွင် အင်းကနက်ကျောင်းဆရာတော် ဘဒ္ဒန္တမုနိန္ဒကို ဥပဇ္ဈာယ်ပြုလျှက် ရဟန်းဒါယကာ ဒေါက်တာသန်းထွန်းအောင် + ရဟန်းဒါယိကာမ ဒေါက်တာသန်းလှ (Family General Hospital) မိသားစုတို့၏ ပစ္စယာနုဂ္ဂဟကို ခံယူကာ အသက် (၂၀) နှစ်အရွယ်တွင် မြင့်မြတ်သော ရဟန်းအဖြစ်သို့ ရောက်ရှိခဲ့ပါသည်။
“ပညာသင်ကြားထေရ်ဆရာများ”
အရှင်ဓမ္မပါလသည် အင်းကနက်ကျေးရွာ ကျေးဇူးတော်ရှင် အင်းကနက်ကျောင်းဆရာတော် ဘဒ္ဒန္တမုနိန္ဒ အထံ၌ အခြေခံ ပရိယတ္တိစာပေများကို သင်ယူကာ တပ်ကုန်းမြို့၊ မဟာဇနကစာသင်တိုက် ဘဒ္ဒန္တဝဏ္ဏာရဟ (မဟာဂန္ထဝါစကပဏ္ဍိတ၊ သာသနဓဇဓမ္မာစရိယ၊ ဝိနယဝိဒူ)၊ ဘဒ္ဒန္တဝရဥာဏ(ဂန္ထဝါစကပဏ္ဍိတ၊ သာသနဓဇဓမ္မာစရိယ၊ ဝိနယဝိဒူ၊ ဒီဃနိကာယဝိဒူ) နှင့် စာချဆရာတော်များ၊ ရန်ကုန်မြို့၊ ဆယ်မိုင်ကုန်း၊ မြတ်သန္ဒာစာသင်တိုက် ဘဒ္ဒန္တစက္ကိန္ဒာလင်္ကာရ (သာသနဓဇဓမ္မာစရိယ၊ ဥဘတောဝိဘင်္ဂဓရ) နှင့် စာချဆရာတော်များ၊ ရန်ကုန်မြို့၊ ဗဟန်းမြို့နယ်၊ ပါဠိတက္ကသိုလ် ညောင်တုန်းကျောင်းတိုက် ဘဒ္ဒန္တပဝရာဘိဝံသ နှင့် စာချဆရာတော်များ၊ ရန်ကုန်မြို့၊ ဗဟန်းမြို့နယ်၊ မဟာသာသနဝေပုလ္လကျောင်းတိုက် ဘဒ္ဒန္တဝေဒပတိ နှင့် စာချဆရာတော်များ အစရှိသော စာချဆရာတော်များအထံတို့၌ အခြေပြုမူလတန်း၊ ပထမငယ်တန်း၊ ပထမလတ်တန်း၊ ပထမကြီးတန်း၊ ဓမ္မာစရိယ (စာချတန်း)ဆိုင်ရာ ပရိယတ္တိစာပေများကို လေ့လာဆည်းပူးခဲ့ပါသည်။
ထို့ပြင် ရန်ကုန်မြို့၊ မင်္ဂလာဒုံမြို့နယ်၊ Kaung Su Wai English Language Center ဘဒ္ဒန္တကဝိဓဇဇောတိ (သာသနဓဇဓမ္မာစရိယ၊ B.A. M.A.) အရှင်သူမြတ်နှင့် Senior ကျောင်းသားကြီးများ၊ တာမွေမြို့ RELT Center, ဆူးလေမြို့ Success Language Academy တို့၌ English Basic, Elementary, Intermediate, Advanced Levels များကို သင်ယူလေ့လာပြီးနောက် ပဲခူးမြို့၊ ဓမ္မဒူတဗုဒ္ဓတက္ကသိုလ်တွင် ဆက်လက်၍ ဘာသန္တရစာပေများကို လေ့လာဆည်းပူးသင်ယူခဲ့ပါသည်။
“အောင်မြင်ခဲ့သော စာမေးပွဲများ”
မြန်မာနိုင်ငံ သာသနာရေးနှင့် ယဉ်ကျေးမှုဝန်ကြီးဌာနက ကျင်းပပြုလုပ်သော စာမေးပွဲများတွင်-
၁၃၇၂-ခုနှစ်တွင် ပထမငယ်တန်းကို၎င်း၊
၁၃၇၄-ခုနှစ်တွင် ပထမလတ်တန်းကို၎င်း၊
၁၃၇၆-ခုနှစ်တွင် ပထမကြီးတန်းကို၎င်း၊
၁၃၈၀-ခုနှစ် ဓမ္မာစရိယစာမေးပွဲတွင် အဋ္ဌသာလိနီကျမ်းကို စစ်ကိုင်းမြို့၊ ရတနာတောင်စဉ်ကျောင်းတိုက်မှ အောင်မြင်ခဲ့ပြီးနောက်၊ ၁၃၈၂-ခုနှစ်တွင် ရန်ကုန်မြို့၊ ဗဟန်းမြို့နယ်၊ မဟာသာသနဝေပုလ္လကျောင်းတိုက်မှ ပါရာဇိကဏ်ကျမ်း၊ သီလက္ခန်ကျမ်းတို့ကို ဝင်ရောက်ဖြေဆို အောင်မြင်တော်မူ၍ “သာသနဓဇဓမ္မာစရိယ” ဘွဲ့တံဆိပ်တော်ကို ရရှိတော်မူခဲ့ပါသည်။
ထို့နောက် ပဲခူးမြို့၊ ဆယ်မိုင်ကုန်း၊ ဓမ္မဒူတဗုဒ္ဓတက္ကသိုလ်မှ ၂၀၁၉-ခုနှစ်တွင် Diploma (Buddha-Dhamma) ဘွဲ့ကိုလည်းကောင်း၊ ၂၀၂၃-ခုနှစ်တွင် “ခိုးခြင်းပရိယာယ်များကို ဒုတိယပါရာဇိကမှ လေ့လာခြင်း” ဟူသော ကျမ်းခေါင်စဉ်ဖြင့် B.A. (Buddhism) ဘွဲ့ကိုလည်းကောင်း အောင်မြင်စွာ ရရှိတော်မူခဲ့ပါသည်။
ယခုအခါ အရှင်ဓမ္မပါလသည် မန္တလေးတိုင်းဒေသကြီး၊ သာစည်မြို့နယ်၊ ညောင်ရမ်းမြို့၊ အင်းကနက်ကျောင်း တိုက် ဘဒ္ဒန္တမုနိန္ဒ၏ ဩဝါဒကိုလည်းကောင်း၊ မန္တလေးမြို့၊ ဘုရားကြီးတိုက် လယ်ဝန်ကျောင်းဆရာတော် ဘဒ္ဒန္တပညာသီရိ (မဟာသဒ္ဓမ္မဇောတိကဓဇ)၏ ဩဝါဒကိုလည်းကောင်း ခံယူ၍ အထက်တန်းကျသော ပိဋကတ် စာပေများကို လေ့လာရင်း ရပ်,ရွာအကျိုး၊ အများအကျိုးနှင့် သာသနာ့တာဝန်များကို ထမ်းဆောင်လျှက်ရှိပါသည်။
◽Camcorder- NX5R
◽Drone- DJI Air 2s
◽VIDEO EDITING PROGRAM
Adobe Premiere Pro 2023
◽VIDEO Encoder
Media Encoder 2023
◽KEYBOARD & MOUSE
Nobi
◽Computer
Intel i5 - 12th Gen
GPU- RTX-2070 8GB (colorful)
THANKS …
#ဆရာတော်
#တေးတပ်
#တုံတုံ
#ဂုဏ်ပြုပွဲ