الشاعر البشير التهامي
غَـــــــزَّة
وِينْ أهْلْ النَّخْوَة وَ الْجَاهْ وَ الشّْهَامَة لِهُمْ عَزْ
وِينْ غَابُوا صَفْوَةْ لَغْزَازِي
أهْلْ غزَّة...
وِينْ عَلِي أَبُو الْحُسْنِينْ مَنْ هْتَكْ خَيْبَرْ وَ بْرَزْ
وِينْ هُمَا لَبْطَالْ ارْمَازِي
وَقْتْ الْحَزَّة...
وِينْ مَنْ هَزْمُو جِيشْ الرُّومْ شَانْ قُوَّتْهُمْ يَفْرَزْ
وِينْ نَصْرْ الْمُعِزْ الْجَازِي
خَيْرُه نُجْزَى...
وِينْ هُوَ صَالَحْ الدِّينْ فَاتْحْ الْقُدْسْ تْمَرْكَزْ
نَاصْرُه رَبِي مَا هُو نَازِي
دْرَكْ الْمَغْزَى...
مَالْكَة عَقْلِي فَلَسْطِينْ سَعْدْهَا مَايلْ مَعْوَزْ
يَا الْعَاتَقْ لَنْفَاسْ الْجَازِي
كُونْ بْغَزَّة..
كَانْ إيمَانْ قْوِي بَاللهْ عَزّْهُمْ بِيهْ مْرَكَّزْ
لِيسْ لِهُمْ لَلدِّينْ مْوَازِي
مَا هُمْ عَجْزَا...
حَالْ مَتْجَرَّدْ مَنْ دِينُه غْشِيمْ يَمْشِي وِ يْدَهْلَزْ
كَانْ يَكْسَبْ ثَرْوَةْ لَحْوَازِي
خَرْتُه يخْزَى...
حِينْ غَابُوا لَشْرَافْ سْيَادْنَا الْقَلْبْ عْفَنْ كَوَّزْ
صَارْ نَاحَلْ عُرْضَة لَلْغَازِي
حَقْ نَتْعَزَّا...
وِينْ أوْلَةْ الْقَبْلَتَيْنْ طَاهْرَة عَزْ مْفَرَّزْ
يَا الْقُدْسْ عْلِيكْ استفزازي
و انتي غزة...
مَالْكَة عَقْلِي فَلَسْطِينْ سَعْدْهَا مَايلْ مَعْوَزْ
يَا الْعَاتَقْ لَنْفَاسْ الْجَازِي
كُونْ بْغَزَّة..
فِي غْسِيقْ النَّكْسَة لَعْمَى عْلَى اسْلَافُه يَتْعَكَّزْ
لُو رْشَفْنَا نَخْوَةْ الاَعْزَازِي
مَا نَا حَرْزَة ...
لِيسْ نَعْرَفْ جَلَّادْ حْنِينْ لُو تْبَسَّمْ غِيرْ طْنَزْ
كِيفْ يَعْدَلْ ظَالَمْ وِيوَازِي
دُونْ اسْتِهْزَا...
ألسّْبَعْ مَا يَرْضَى مُحَالْ صِيفْةْ النَّعْجَة يَنْجَزْ
مَنْ ضْعَفْ حَلْبُوهْ بْلَا مْوَازِي
بْحَالْ الْمَعْزَة ...
لُو زْهَرْ بُوشَمْلَة كُلْ الْوْحُوشْ مَنْ خَوْفُه تَقْفَزْ
وَ الْخْرُوفْ يْبَعْرَرْ جَمَّازِي
مَا لُه هَزَّة..
مَالْكَة عَقْلِي فَلَسْطِينْ سَعْدْهَا مَايلْ مَعْوَزْ
يَا الْعَاتَقْ لَنْفَاسْ الْجَازِي
كُونْ بْغَزَّة..
حَالْ مَكْسُورْ جْنَاحْ بْغَى يْطِيرْ وَ تْخَبَّطْ عَاجَزْ
مَا يْكَّلْ مْأَثَّرْ بَكْزَازِي
دُونْ الْحَوْزَة..
مَنْ خْذَلْ فِي عَزُه وَ انْهَانْ رَغْمْ عَنُّه يَتْحَفَّزْ
ألْعْرَا عَلَّمْ التَّخْرَازِ
مُولَى رَكْزَة..
ألصّْوَارَخْ تَتْهَاطَلْ فُوقْ شَعْبْ مَقْهُورْ مْحَاوَزْ
مَرْتْجَمْ بَقْنَابَلْ الْغَازِي
وِينْ الْفَزَّة..
شَفْتْ حَجْرَة تَتْصَدَّى لَلرّْصَاصْ تَفتَـكْ مَتْخَزْبَزْ
نَحْتْسَبْ لَلْمُقْتَدِرْ رَازِي
قَبْلْ الَّكْزَة..
مَالْكَة عَقْلِي فَلَسْطِينْ سَعْدْهَا مَايلْ مَعْوَزْ
يَا الْعَاتَقْ لَنْفَاسْ الْجَازِي
كُونْ بْغَزَّة..
ألْيْهُودِي وَلَّى لُه شَانْ دَارْ مَنْقَابْ وْ شَغَّزْ
يَسْتْهَلْ عُنْقُه تَحْتْ جْرَازِي
دُونْ حْزَازَة..
ألْجْهَادْ اوْجَبْ عْلِينَا جْمِيعْ هَيَّا نَتْجَهَّزْ
نَسْتْرَدْ حُرْمَةْ زَهْوْ اغْمَازِي
دَرْكْ الْمَغْزَى..
مَنْ شْمَازِي زَادْ حْزَازِي غْرَايْزِي زَاهِي نَرْجَزْ
ذَابْ فَرْحِي فِي قَرْحْ عْزَازِي
لُو نَتْعَزَّى..
ألْمْحَاجَزْ تَحْصَرْ وَ تْبَزْ مَرْوْ مَتْشَوَّقْ يَنْجَزْ
وَ الْمْزِيَّفْ قَصْدْ انْتِهَازِي
مَتَّنْ رَكْزَة ..
قَالْ بَشِيرْ التهَامِي بْقَلْبْ وَاجَلْ مْغَرَّزْ
لِيسْ يَكْمَلْ فَرْحِي وَ مْفَازِي
دُونَكْ غَزَّة..
مَالْكَة عَقْلِي فَلَسْطِينْ سَعْدْهَا مَايلْ مَعْوَزْ
يَا الْعَاتَقْ لَنْفَاسْ الْجَازِي
كُونْ بْغَزَّة.